სოხუმში აცხადებენ, რომ 18:00 საათისთვის აფხაზეთის თვითგამოცხადებულ რესპუბლიკაში, „საპრეზიდენტო“ არჩევნების მეორე ტურში, ამომრჩეველთა აქტივობამ 63% შეადგინა და კენჭისყრაში მონაწილეობა თითქმის 90 ათასმა ადამიანმა მიიღო, შესაბამისად, „არჩევნები“ ჩატარდა.

მანამდე „ცესკოს“ ხელმძღვანელმა დიმიტრი მარშანმა განაცხადა, რომ „არ დაფიქსირებულა ისეთი დარღვევები, რომლებიც შეიძლება გავლენა იქონიოს არჩევნების შედეგებზე“.

დღეს, 1 მარტს, აფხაზეთში საპრეზიდენტო არჩევნების განმეორებითი კენჭისყრა გაიმართა.

„პრეზიდენტობისთვის“ ორი კანდიდატი იბრძვის: ოპოზიციონერი ადგურ არძინბა და ყოფილი "პრეზიდენტის" ასლან ბჟანია თანაგუნდელი, ბადრა გუნბა, რომელსაც რუსეთი ღიად უჭერს მხარს.


"საპრეზიდენტო" არჩევნების პირველი ტური, ოკუპირებულ აფხაზეთში 2025 წლის 15 თებერვალს ჩატარდა. 

გუშინ, რუსეთის საგარეოო უწყების წარმომადგენელმა, მარია ზახაროვამ განაცხადა, რომ „ყურადღებით აკვირდებიან სიტუაციას აფხაზეთში, რომელსაც რუსეთს დიდი ხნის მეგობრული ურთიერთობები აკავშირებს და მოსკოვი მოელის, რომ აფხაზეთში საარჩევნო ციკლის დასრულება, გამოიწვევს რესპუბლიკის სტაბილურობის გაძლიერებას".

ყოფილი “პრეზიდენტი” ასლან ბჟანია თანამდებობიდან 2024 წლის 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა.