„ჯერმანვინგზის“ კუთვნილი თვითმფრინავის ჩამოვარდნის ადგილზე მაშველებმა მისვლა ტრაგედიიდან რამდენიმე საათის შემდეგ შეძლეს. „ევრონიუსის“ ცნობით, ფრანგული ალპების ის მონაკვეთი, სადაც ჩამოვარდნილი თვითმფრინავი იპოვეს, ძნელად მისადგომია. მაშველებმა „შავი ყუთი“ იპოვეს და პარიზში გააგზავნეს, დღეს ექსპერტები ჩანაწერების გაშიფრვას დაიწყებენ. საფრანგეთის შს მინისტრის პრეს–მდივანი, პიერ–ანდრი ბრანდე აცხადებს, რომ ახლა იურიდიული გამოძიების ფაზა იწყება, რომელიც იქნება ხანგრძლივი და მოითხოვს სკურპულოზურ მუშაობას. „უნდა ვიპოვოთ ცხედრები, მოხდეს მათი იდენტიფიკაცია, შემდეგ გადაეცეს ოჯახებს. რაც მთავარია, უნდა ჩავეჭიდოთ ყველა მტკიცებულებას, რაც მიგვიყვანს საბოლოო შედეგამდე და გავარკვევთ, რა გახდა კატასტროფის მიზეზი,“ – აცხადებს ბრანდე. A320, რომელიც ბარსელოდანად დიუსელდორფში მიფრინავდა, გუშინ საფრანგეთის ტერიტორიაზე ჩამოვარდა. ბორტზე 150 ადამიანი იმყოფებოდა, სავარაუდოდ, ყველა მათგანი გარდაიცვალა. კატასტროფამდე 8 წუთით ადრე თვითმფრინავმა, რომელიც 11,5 ათასი მეტრის სიმაღლეზე მიფრინავდა, სწრაფად დაიწყო ძირს ვარდნა, შემდეგ კი პილოტი შეეცადა ჰაერში დაემუხრუჭებინა. „ევრონიუსის“ ინფორმაციით, ამ პერიოდის განმავლობაში სახმელეთო სამსახურებს არცერთი პილოტი არ დაკავშირებია. მიწაზე ჩამოვარდნის მომენტში თვითმფრინავი ნაწილებად დაიშალა. კომპანია Germanwings „ლუფთანზას“ ეკუთვნის. „ლუფთანზას“ წარმომადგენლები აცხადებენ, რომ კატასტროფის მიზეზი უბედური შემთხვევა გახდა. ლაინერმა გაფრენის წინა დღეს ტექდათვალიერება გაიარა.