სოფელ რუხში, ენგურის ხიდთან პოლიტიკური მოძრაობა “ლელოს” წარმომადგენლები, პარტიის ახალგაზრდული ორგანიზაციის წევრებთან ერთად, შეიკრიბნენ და აქცია გამართეს. მათ აფხაზეთის საბჭოთა ოკუპაციის დღესთან დაკავშირებით, საპროტესტო ტრანსპარანტები მიიტანეს. გარდა ამისა, აქციაზე სოფელ ფახულანისთვის “საზღვრისპირა” სოფლის სტატუსის მოხსნა და აქ მცხოვრებლებისთვის უფასო სწავლების გაუქმება გააპროტესტეს.

„ზუსტად ერთი საუკუნის წინ, დღევანდელ დღეს მოხდა სოხუმის დაცემა, აფხაზეთის საბჭოთა ოკუპაცია. ჩვენ ვაპროტესტებთ ოკუპაციას, ოკუპაციას რომელიც რუსეთიდან მომდინარეობს და შიგნიდანაც არის ხელშეწყობილი. ჩვენი ვალია ვიდგეთ დღეს აქ, სადაც რუსის ჯარი არ გვიშვებს მივიდეთ ჩვენს  ძმებთან და ჩვენს ისტორიულ ტერიტორიაზე, - აღნიშნა „ლელოს“ წარმომადგენელმა თამარ ბელქანიამ.
1921 წლის თებერვალ-მარტში რუსეთის საბჭოთა ხელისუფლებამ განახორციელა საქართველოს დემოკრატიული რესპუბლიკის ოკუპაცია და ანექსია. 23 თებერვალს დაეცა გაგრა, 4 მარტს კი სოხუმი. მე-9 არმია სოფელ რუხთან, ენგურის ხიდის მიმდებარედ 8 მარტს დაბანაკდა, თუმცა იმ დღეს ადიდებული მდინარის გამო ვერ მოახერხეს ზუგდიდში გადმოსვლა. 31-ე მსროლელმა დივიზიამ ზუგდიდი 9 მარტს დაიკავა.