"საერთაშორისო გამჭვირვალობა - საქართველო" ქალაქ ფოთის მუნიციპალიტეტის საკრებულოს მიერ 2022 წელს გაწეულ საქმიანობას აფასებს. არასამთავრობო ორგანიზაციის მერე გამოქვეყნებულ ანგარიშში ვკითხულობთ, რომ ფოთის საკრებულო საანგარიშო პერიოდში მერიასა და მუნიციპალიტეტის მიერ დაფუძნებულ პირებზე სუსტ ზედამხედველობას ახორციელებდა, არ გამოვლენილა საკრებულოს რეგლამენტისა და ეთიკის ნორმების დარღვევის ფაქტები.

თI-ის შეფასებით, მნიშვნელოვნად გაუმჯობესდა საკრებულოს სხდომათა საორგანიზაციო მხარე, განსხვავებით 2020 წლისაგან, 2022 წელს სულ 14 სხდომა ჩატარდა, რომელთაგან მხოლოდ ორი იყო რიგგარეშე. გასულ წელს კი საკრებულომ 53 დადგენილება მიიღო, რომელთაგან 42-ის ავტორი ქალაქის მერი იყო, 11 დადგენილება კი საკრებულო ცალკეული კომისიების ინიციირებით მიიღეს, ერთადერთი ფრაქცია, რომელმაც გასულ წელს ინიციატივა არ ჰქონია "ფოთი საქართველოსთვისაა".

არასამთავრობო ორგანიზაციის შეფასებით, ფრაქციათა მიერ გაწეული საქმიანობის მინიმალური მაჩვენებლის ფონზე, შეუსაბამოდ დიდია მათ ფუნქციონირებაზე გაწეული ხარჯები, რომელმაც ჯამში 416,286 ლარი შეადგინა.

ანგარიშში ყურადღება გამახვილდა ფოთის საკრებულოში არსებულ გენდერული თანასწორობის საბჭოს საქმიანობაზეც. თI-ის ინფორმაციით საბჭოს 2022 წელს, წინა პერიოდის მსგავსად, არ განუხორციელებია როგორც სამართლებრივი აქტების ანალიზი, ასევე ექსპერტიზა საკანონმდებლო აქტების პროექტებზე.

"შემცირდა საკრებულოს სხდომების გაცდენის მაჩვენებელი, 2022 წელს საკრებულოს წევრებმა საკრებულოს სხდომები 50-ჯერ გააცდინეს, მათ შორის 46-ჯერ არასაპატიო მიზეზით. კომისიების სხდომების გაცდენის 133 შემთხვევა დაფიქსირდა, მათ შორის 124-ჯერ არასაპატიო მიზეზით;

საკრებულოს წევრთა შორის ყველაზე მეტი - 9 სხდომა არასაპატიო მიზეზით ფრაქცია "ერთიანი ნაციონალური მოძრაობის" წევრმა, მიხეილ ფირცხალავამ გააცდინა, არასაპატიო მიზეზით საკრებულოს სხდომის გაცდენების რაოდენობით ლიდერებს შორის არიან ამავე ფრაქციის თავმჯდომარე, დარეჯან ცხვიტარია (8 გაცდენა) და ფრაქციის თავმჯდომარის მოადგილე, პაატა ჩაგანავა (7 გაცდენა);

საკრებულოს წევრთა შორის კომისიის ყველაზე მეტი (27) სხდომა არასაპატიო მიზეზით გააცდინა ფრაქცია "ერთიანი ნაციონალური მოძრაობის" თავმჯდომარემ პაატა ჩაგანავამ. კომისიის სხდომის არასაპატიო მიზეზით გაცდენების რაოდენობით ლიდერებს შორის არიან ამავე ფრაქციის წევრი ლაშა რუხაია (14 გაცდენა) და ფრაქციის თავმჯდომარე დარეჯან ცხვიტარია (12 გაცდენა). ჩვენი ინფორმაციით, ლაშა რუხაია უკრაინაში მოხალისედ იბრძვის რუსეთის საოკუპაციო ძალების წინააღმდეგ.

2022 წელს ფოთის საკრებულოს 35 წევრიდან სიტყვით გამოსვლის უფლებით არ უსარგებლია საკრებულოს 11 წევრს, მოხსენებით არ წარმდგარა საკრებულოს 27 წევრი;

ფოთის საკრებულომ 2022 წელს 1,565,832 ლარი დახარჯა, რაც 272,032 ლარით მეტია 2020 წლის ანალოგიურ მაჩვენებელთან შედარებით;

2022 წელს შრომის ანაზღაურებაზე 1,343,413 ლარი დაიხარჯა;
საკრებულომ 102,159 ლარად შეისყიდა 31.6 ტონა საწვავი, რომლის საერთო ოდენობის 18% - 5,702 ლიტრი ფოთის საკრებულოს თავმჯდომარემ, ალექსანდრე ტყებუჩავამ მოიხმარა;

2022 წელს გაწეული საქმიანობისთვის გაღებული ხარჯების ასანაზღაურებლად 105,134 ლარი მიიღეს იმ წევრებმა, რომლებიც არ იკავებენ თანამდებობას. სატელეფონო კომუნიკაცია ფოთის საკრებულოს 6,683 ლარი დაუჯდა. სამივლინებო ხარჯებმა 8,843 ლარი შეადგინა,"- ვკითხულობთ ორგანიზაციის ანგარიშში.

რეკომენდაციის სახით "საერთაშორისო გამჭვირვალობა - საქართველო" ფოთის მუნიციპალიტეტის საკრებულოს წევრებს მოუწოდებს, უფრო აქტიურად ჩაერთონ საზედამხედველო საქმიანობაში და ქმედითად გაკონტროლდეს სახელმწიფო შესყიდვების პროცესი, მსხვილ ინფრასტრუქტურულ პროექტებში.

"საგრძნობლად უნდა გაუმჯობესდეს საკრებულოს და საკრებულოს კომისიების სხდომებზე საკრებულოს წევრთა დასწრების მაჩვენებლები. მიგვაჩნია, რომ საკრებულოს ყველა წევრი პასუხისმგებლობით უნდა მოეკიდოს საკრებულოს სხდომაზე დასწრების საკითხს. საკრებულოს თითოეული წევრის მხრიდან სხდომის გაცდენის საპატიო თუ არასაპატიო მიზეზი უნდა იყოს გამორკვეული და სათანადო ღონისძიებებიც გამოყენებული;
აუცილებელია საკრებულოს წევრებმა აქტიურად ისარგებლონ როგორც საკრებულოს, ასევე კომისიის სხდომაზე სიტყვით გამოსვლის უფლებით, წარადგინონ მოსაზრებები განსახილველ საკითხებზე, მიაწოდონ საკრებულოს და მერიას ინფორმაცია მოქალაქეთა კონკრეტული საჭიროებების შესახებ;

მნიშვნელოვანია, რომ ფრაქციის საქმიანობა სარგებლის მომტანი იყოს შესაბამისი თვითმმართველობისათვის. ფრაქცია აქტიურად უნდა ჩაერთოს საკრებულოს უფლებამოსილებას მიკუთვნებული საკითხების განხილვისა თუ გადაწყვეტის პროცესში, შეისწავლოს/გააკონტროლოს მერიისა თუ მუნიციპალური იურიდიული პირების საქმიანობა; წარსდგეს საკრებულოში ინიციატივებით, აქტიურად ჩაერთოს ბიუჯეტირების პროცესში და ა.შ. ფრაქციები ზრდის თვითმმართველობაში მოქალაქეთა ჩართულობას, მხარს უჭერს ადგილობრივ ინიციატივებს, აგრეთვე მოქალაქეთა საჭიროებებისა და პრობლემების ადვოკატირებას. შესაბამისად, მოვუწოდებთ ფრაქციებს, აღნიშნული ინსტრუმენტები აქტიურად გამოიყენონ.
საკრებულოს ხარჯები,"- ვკითხულობთ თI-ის ანგარიშში.

წლიურ ანგარიშში ყურადღება გამახვილდა თვითმმართველობაში მოქალაქეთა ჩართულობის მნიშვნელობაზე, თI-ის შეფასებით ამის ერთ-ერთი მთავარი მექანიზმი დასახლებების საერთო კრებების ორგანიზებაა, თუმცა მსგავსი აქტივობა ფოთში ჯერ არ განხორციელებულა. ორგანიზაცია საკრებულოს მოუწოდებს მიმართოს მერს დასახლების საერთო კრების ჩატარების შუამდგომლობით.