„აფხაზეთის ჰუმანიტარული პროგრამების ცენტრის“ დირექტორი არდა ინალ-იფა თვითგამოცხადებული რესპუბლიკის საგარეო საქმეთა სამინისტროს ხელმძღვანელის ინალ არძინბას განცხადებას გამოეხმურა, რომლის თანახმადაც, აფხაზეთში USAID - ის მიერ დაფინანსებული პროექტები იკრძალება, ხოლო სამხრეთ კავკასიაში USAID-ის მისიის ხელმძღვანელი ჯონ პენელი, პერსონა ნონ გრატად გამოცხადდება, წერს „ეხო კავკვაზა“.

„მინისტრი არძინბას განკარგულებები უკვე არავის აკვირვებს, - მას დიდი ხანია აქვს დასახული მიზნად, რომ არ იმუშაოს საერთაშორისო ორგანიზაციებთან, ის არ ცდილობს გაადაარწმუნოს ისინი, რათა საერთაშორისო ფონდების მხარდაჭერა აფხაზეთის საზოგადოების აქტუალური პრობლემების გადასაჭრელად მიმართოს, არამედ ცხელ გულზე იღებს გადაწყვეტილებებს, რითაც გვაშორებს საერთაშორისო პარტნიორებს, წყვეტს აფხაზეთს გარე სამყაროსგან, აქცევს მას დახურულ ტერიტორიად.

სინამდვილეში, ინალ არძინბა საერთოდ არ არის დაკავებული დიპლომატიით, როგორც ამას მისი მანდატი მოითხოვს, პირიქით, ის ძირს უთხრის ჩვენი წინა მინისტრებისა და მათი კოლეგების მიღწევებს, სხვადასხვა საერთაშორისო ოგანიზაციებთან ურთიერთობაში, რაც მოითხოვს შემოქმედებით და არა ასეთ სწორხაზოვან მიდგომებს“, - ამბობს არდა ინალ-იფა. 

მისი თქმით, ეს გადაწყვეტილება არის ანტიაფხაზური, რაც „აფხაზეთის კიდევ უფრო მეტ იზოლაციას გამოიწვევს“.

„ ასეთი განკარგულებები მნიშვნელოვნად ართულებს აფხაზეთის საერთაშორისო კონტაქტების გაფართოების ამოცანას, რომლის გარეშეც შეუძლებელია ჩვენი დამოუკიდებლობის აღიარების იდეის ხელშეწყობა“, - დასძინა მან.

გამოცემის თანახმად, მანამდე, სოხუმში ჩასულმა  მარგარიტა სიმონიანმა, სატელევიზიო არხის RT-ის მთავარმა რედაქტორმა, გააკრიტიკა USAID და „აფხაზეთის ხელმძღვანელობას" უსურვა „სიბრძნე, გამბედაობა და ძალა უკომპრომისო ბრძოლაში საერთაშორისო ორგანიზაციებთან და არასამთავრობო ორგანიზაციებთან".

ინფორმაციისთვის, დღეს, 8 დეკემებერს, აფხაზეთის თვითაღიარებული რესპუბლიკის საგარეო საქმეთა მინისტრმა ინალ არძინბამ განცხადება გაავრცელა, რომელშიც საუბარია აფხაზეთში მოქმედ საერთაშორისო არასამთავრობო ორგანიზაციებთან ურთიერთობის ახალი მიდგომების შესახებ. მისი თქმით, იკრძალება პროექტები, რომელთა მიზანია "აფხაზეთისა და საქართველოს მოქალაქეებს შორის კონტაქტების დამყარება", ასევე, იმ მედიაპროექტების დაფინანსება, რომელთა მიზანია "აფხაზეთის საშინაო და საგარეო პოლიტიკის გაშუქება".