"ევროპული საქართველოს" წევრებმა ენგურჰესის კაშხლის მიმდებარედ ბრიფინგი გამართეს და შესაძლო კორუფციულ სქემაზე ისაუბრეს. მათ აფხაზეთის დე ფაქტო რესპუბლიკისთვის ენგურჰესის მიერ გამომუშავებული ენერგიის განაწილება გააპროტესტეს.

პარტიის ერთ-ერთმა ლიდერმა გიგა ბოკერიამ აღნიშნა, რომ იმ დროს, როდესაც საოკუპაციო რეჟიმი ეთნიკური ქართველების უფლებებს უხეშად არღვევს, საქართველოს ხელისუფლებამ რისკები მაქსიმალურად უნდა შეამციროს და ბერკეტები გამოიყენოს.

"ჩვენ ვართ ახლა ენგურჰესთან, აქედან ძალიან ახლოს არის რუსეთის მიერ ოკუპირებული ტერიტორიები, აფხაზეთი. ტერიტორია, სადაც არის აპარტეიდული რეჟიმი, სადაც ეთნიკურ ქართველებს მიიჩნევენ როგორც მესამე ხარისხოვან მოქალაქეებს, სადაც ცოტა ხნის წინ ჩვენი მოქალაქე მოკლეს, სადაც ციხეში ზის ადამიანი დროშის დაწვისთვის ცხრა წლით, სადაც კატასტროფული ვითარებაა.

ჩვენ კარგად გვესმის, რომ სანამ დეოკუპაცია არ მოხდება, ეს ვითარება მთლიანად ვერ შეიცვლება, მაგრამ ოკუპაციის პირობებშიც საქართველოს ხელისუფლებას აქვს ინსტრუმენტები, რომლებიც, ვალდებულია, გამოიყენოს იმისთვის, რომ შეამციროს რისკი ჩვენი მოქალაქეებისთვის", - თქვა მან.

ბოკერიას განმარტებით, ენგურჰესი ერთ-ერთი მოქნილი ინსტრუმენტია სოხუმზე წნეხის გასაზრდელად, მაგრამ მთავრობა არაფერს აკეთებს მისი სწორად გამოყენებისთვის.

"დღეს ჩვენ გვაქვს ვითარება, რომ ბოლო წლების განმავლობაში ენგურჰესი თითქმის მთლიანად ემსახურება საოკუპაციო რეჟიმს. მოცემული მაქვს გრაფიკი, თუ წლების განმავლობაში როგორ იცვლებოდა ბალანსი არაოკუპირებული საქართველოსთვის მოხმარებული ენერგიისა და საოკუპაციო რეჟიმის მიერ წართმეული ელექტროენერგიის მოცულობისა.

90-იანი წლების შეთანხმება იყო 60/40-ზე, ეს არ იყო სასურველი ამბავი, მაგრამ ასე განაწილდა. ბოლო წლებში ჩვენ ავედით საშუალოდ 80%-მდე, ამ ხელისუფლების პირობებში, ენგურჰესის 80%, ზოგჯერ მეტიც კი, მიეწოდება საოკუპაციო რეჟიმს", - ხაზი გაუსვა ბოკერიამ.

როგორც ის ამბობს, მსგავსი გადაწყვეტილებები აჩენს კითხვებს და ბადებს ეჭვებს, რამდენად ჯდება სახელმწიფო ინტერესებში ელექტროენერგიის ამ პრინციპით გადანაწილება.

"მტერთან კომპრომისი შეიძლება აუცილებელი გახდეს, მაგრამ ჩვენ უნდა ვიცოდეთ რისთვის აკეთებს ის ხელისუფლება ამას, რომელიც, წესით, ჩვენს ინტერესებს უნდა იცავდეს. რატომ ვაფინანსებთ ენერგიით და რატომ ვაწვდით ჩვენს მტერს ენერგიას, რაში არის ეს გაცვლილი, თუკი იქ მდგომარეობა უარესდება ჩვენი მოქალაქეებისთვის, თუ მკვლელობები გრძელდება და თუ ამისთვის არანაირ ფასს ჩვენი მტერი არ იხდის. აქ ჩნდება ვერსია და ლეგიტიმური ეჭვი, რომ არის პოლიტიკური გარიგება ჩვენს მტერთან ჩვენი ეროვნული ინტერესების ხარჯზე, ან კომერციული, ანუ კორუფციული გარიგება, რაზეც მრავალი ვერსია გამოითქვა, რომ ოკუპირებულ ტერიტორიაზე მაინინგი ხდება და ამისთვის გამოიყენება ელექტროენერგია. აქედან ლოგიკური ეჭვი ჩნდება, რომ ამ კომერციულ ინტერესში ჩართული არის ვიღაც საქართველოს ხელისუფლებიდან", - გვითხრა მან.

ბოკერიამ ასევე აღნიშნა, რომ აფხაზეთის თვითგამოცხადებულ რესპუბლიკაში არ უმჯობესდება ვითარება და ამ შემთხვევაში, ხელისუფლებამ მთლიანად უნდა ჩაკეტოს ენერგომიწოდების არხი.

"ეს შეგვიძლია ჩვენი ენერგეტიკისთვის მნიშვნელოვანი ზარალის გარეშე იმიტომ, რომ ისედაც ვაძლევთ თითქმის 100%-ს ჩვენს მტერს.

ნორმალური მთავრობის პირობებში, ამ ვითარებას უნდა იძიებდეს უსაფრთხოების სამსახური, ხომ არ გვაქვს აქ საბოტაჟთან საქმე, ეს კითხვები რიტორიკულად მაინც უნდა დაისვას და იქცეს თემად", - ასე ასრულებს საუბარს ბოკერია.

თავის მხრივ, ენგურჰესის დირექტორმა ლევან მებონიამ განაცხადა, რომ წლის დასაწყისიდან დღემდე აფხაზეთი ენგურჰესიდან არა 80%-ს, არამედ 41-42% ელექტროენერგიას მოიხმარს.

"ენგურჰესის წილი საქართველოს ელექტრომომარაგების შეადგენს თითქმის 30-35 %-ს. 80 % რომ მიდიოდეს აფხაზეთში, როგორ იქნებოდა ეს. ყოველ თვე ვითვლით ამ მონაცემებს. დღეისთვის, ამ დროისთვის, დაახლოებით, 58 % საქართველოს სასარგებლოდ, ხოლო 42 % აფხაზეთის. სამწუხაროდ, თანხას არ იხდიან.", - განმარტა მებონიამ.

მისივე ინფორმაციით, აფხაზეთის დე ფაქტო რესპუბლიკაში დაიწყო გამრიცხველიანება, მაინინგის დახურვა და კონფისკაცია, შარშანდელ პერიოდთან შედარებით კი 350 მლნ კილოვატ-საათით შემცირდა მათ მიერ ენგურჰესის ენერგიის მოხმარება.