"რუსეთის მიერ ოკუპირებულ აფხაზეთში დე ფაქტო ხელისუფლებამ აკრძალა იმ ეთნიკური ქართველების ქონებრივი მოთხოვნა, რომლებმაც აფხაზეთი 1992-1993 წლის ომისას დატოვეს. ამით იძულებით გადაადგილებულ პირებს წაერთვათ საკუთრების უფლება", - ამის შესახებ აშშ-ის სახელმწიფო დეპარტამენტი ადამიანის უფლებების 2023 წლის ანგარიშში წერს.

დოკუმენტში აღნიშნულია, რომ აფხაზეთის დე ფაქტო რესპუბლიკა რჩებოდა ცენტრალური ხელისუფლების კონტროლს მიღმა და მისი ე.წ ხელისუფლება მხარდაჭერილია რუსეთის ძალების მიერ.

სახელმწიფო დეპარტამენტი ხაზს უსვამს ოკუპირებულ გალში საპოლიციო ძალების მიერ საქართველოს მოქალაქის თემურ კარბაიას სასტიკად ცემის ფაქტს, რის შედეგადაც ის გარდაიცვალა.

ანგარიშში ასევე წერია, რომ 2019 წელს აფხაზეთის დე ფაქტო პარლამენტმა მიიღო "კანონმდებლობა", რომელიც ართმევს მემკვიდრეობის უფლებას იმ ადამიანების ოჯახის წევრებს, ვინც "აფხაზეთის სუვერენიტეტის წინააღმდეგ იბრძოდა, აფხაზეთის წინააღმდეგ საომარ მოქმედებებში მონაწილეობდა, ან ეხმარებოდა საოკუპაციო ძალებს".

"საერთაშორისო ჰუმანიტარულმა ორგანიზაციებმა განაცხადეს, რომ რუსეთის მიერ ოკუპირებული აფხაზეთიდან და სამხრეთ ოსეთიდან დაახლოებით 290 000 იძულებით გადაადგილებული პირის (დევნილების) უმრავლესობას სურდა დაბრუნებულიყო საკუთარ მიწაზე, მაგრამ არ ჰქონდათ ეკონომიკური და პოლიტიკური უსაფრთხოების გარანტიები", - განმარტავს დეპარტამენტი.

გამოქვეყნებულ დოკუმენტში საუბარია გადაადგილების თავისუფლების პრობლემაზე, რაც მათი განცხადებით, საქართველოს პასპორტებით ადმინისტრაციული ხაზის გადაკვეთის უფლების შეზღუდვით გამოიხატა.