ზუგდიდის მუნიციპალიტეტის მერის მამუკა წოწერიას თქმით, ზუგდიდი უერთდება "ქართული ოცნების" მიერ თბილისში დღეს, 29 აპრილს, "აგენტების კანონის" მხარდასაჭერად დაგეგმილ კონტრაქციას.

მისივე ინფორმაციით, ზუგდიდიდან 5 ათასამდე ადამიანია მობილიზებული. წოწერიას მტკიცებით, ამ ადამიანების დიდი ნაწილი, თვითორგანიზებით შეიკრიბა და მათ მიმართ არ ყოფილა არანაირი ზეწოლა.

ჟურნალისტების შესაბამის კითხვაზე, მან უპასუხა, რომ არავითარი დავალება მმართველი პარტიისგან არ მიუღიათ საჯარო მოხელეებს, მათ შორის, არც სკოლებისა და ბაღების ადმინისტრაციას.

"არ ვიცი, ვინ რეკავდა, ვინც რეკავდა, ის არის პროვოკატორი, სააღმზრდელო სასწავლო პროცესს არავინ არ ეხება, მსგავსი დავალება, ვინმეს დაშინება, ეს არ არის "ქართული ოცნების" ხელისუფლების მართვის სტილი, ყველაფერი დაფუძნებულია საკუთარ ნებაზე, არავინ არ დაელაპარაკება მოსახლეობას, გარდა ნაციონალური მოძრაობის ხელისუფლებისა... ეს არის ძალიან დიდი შეურაცხყოფა მოსახლეობისა, ზოგიერთს მოსყიდულებს ეძახიან", - აღნიშნა მან.

კითხვაზე, თუ როგორ იფუნქციონირებს მერიის სტრუქტურები, როდესაც თანამშრომლების უმეტეს ნაწილს, ერთდღიანი შვებულება აქვს აღებული, აქციაში მონაწილეობის მისაღებად, მან განაცხადა:

"საჯარო სექტორიდან თუ ვინმე მოდის, კანონით გათვალისწინებულ ფარგლებში, მათაც აქვთ თავიანთი ეროვნული ინტერესები და მიიღებენ მონაწილეობას საერთო - სახალხო შეკრებაში, რა თქმა უნდა, ფუნქციები ერთი დღით ისე არის გადანაწილებული, რომ არცერთ სფეროს მუნიციპალიტეტის მერიის, საკრებულოს მუშაობისას ხელი არ შეეშლება, მონაწილეობას მივიღებთ დღევანდელ შეხვედრაში და ჩვეულ რეჟიმში დაბრუნდება ყველა სტრუქტურა ჩვენი მუნიციპალიტეტის".

დღეს, 29 აპრილს "ქართული ოცნება" რეგიონებიდან მხარდამჭერების ჩაყვანას გეგმავს. ზუგდიდიდან ათეულობით სამარშრუტო ტაქსი უკვე გაემზავრა თბილისში.

კვირას, 28 აპრილს, "აგენტების კანონის" საწინააღმდეგო მრავალათასიანი აქცია-მსვლელობა გაიმართა თბილისში, რესპუბლიკის მოედნიდან რუსთაველის გამზირამდე.

დღეს ფრაქცია "ქართული ოცნების" საკანონმდებლო ინიციატივას "უცხოური გავლენის გამჭვირვალობის შესახებ" პარლამენტის იურიდიულ საკითხთა კომიტეტი მეორე, მუხლობრივი მოსმენით განიხილავს.

საქართველოს პარლამენტმა, 83 ხმით, "უცხოური გავლენის გამჭვირვალობის შესახებ" კანონპროექტი პირველი მოსმენით 17 აპრილს მიიღო.

კანონპროექტის 83 მხარდამჭერიდან ზუგდიდელი, ხობელი და ფოთელი დეპუტატებიც არიან.

ამავე თემაზე:

რატომ არა ე.წ აგენტების კანონს - ზუგდიდელების პასუხები (ფოტო/ვიდეო)

რუსული კანონით აფხაზეთს ვერ დავიბრუნებთ - აქცია ზუგდიდში (ფოტორეპორტაჟი)

რადიო "ათინათი" სხვა მედიებთან ერთად ე.წ აგენტების კანონის პარლამენტში წარდგენას აპროტესტებს

დაუშვებლად მივიჩნევთ რუსული კანონის მიღებას - მედიაორგანიზაციები, მათ შორის "ათინათი" ერთობლივ განცხადებას ავრცელებენ

რადიო "ათინათი" არ გეგმავს "უცხოური გავლენის აგენტად" დარეგისტრირებას - განცხადება