სტატისტიკის ეროვნული სამსახურის ინფორმაციით, 2024 წლის პირველ კვარტალში (იანვარ-მარტი) საქართველოში პირდაპირი უცხოური ინვესტიციების მოცულობამ 201.4 მლნ დოლარი შეადგინა, რაც გასული წლის ანალოგიური პერიოდის მაჩვენებელზე 64.4%-ით ნაკლებია.

საქსტატში ამბობენ, რომ შემცირება განპირობებულია სააქციო კაპიტალის, რეინვესტიციისა და სავალო ვალდებულებების მაჩვენებლის კლებით.

სტატისტიკის მიხედვით, 2024 წლის იანვარ-მარტში, ეკონომიკის სხვადასხვა სექტორში, ძირითადი ინვესტორი სახელმწიფოები იყვნენ: თურქეთი - 42.4 მლნ დოლარი, ჩეხეთი - 41. 5 მლნ დოლარი, აშშ - 33.7 მლნ დოლარი, ნიდერლანდები - 32.3 მლნ დოლარი, მარშალის კუნძულების რესპუბლიკა - 22.3 მლნ დოლარი, იაპონია - 19.3 მლნ დოლარი.

ამავე ინფორმაციით, ყველაზე მეტი პირდაპირი უცხოური ინვესტიცია ენერგეტიკის სექტორს შეეხო. მან 78.7 მლნ დოლარი მოიზიდა. მეორე ადგილს იკავებს ვაჭრობა - 39.5 მლნ დოლარით (19.6 პროცენტი), მესამე ადგილზე კი ტრანსპორტის სექტორია - 38.8 მლნ დოლარით (19.3 პროცენტი).