საარჩევნო ადმინისტრაციის ინფორმაციით, საინფორმაციო კამპანია სახელწოდებით "ელექტრონული არჩევნების საყოველთაო დემონსტრირება" მიმდინარე წლის 6 ივლისიდან დაიწყება და მისი მიზანია საარჩევნო ტექნოლოგიების დანერგვის შესახებ ამომრჩეველთა ინფორმირება და ხმის მიცემის პროცედურების პრაქტიკული უნარ-ჩვევების გამომუშავება. ამის შესახებ ინფორმაცია ცესკოს ვებ გვერდზე გამოქვეყნდა.

"პროექტი როგორც თეორიულ, ისე პრაქტიკულ კომპონენტებს ითვალისწინებს. პროექტის ფარგლებში გამართულ შეხვედრებზე ამომრჩევლები პირადად გაეცნობიან ვერიფიკაციისა და ხმის მთვლელი აპარატების მუშაობას, უზრუნველყოფილი იქნება კენჭისყრის იმიტაცია, კერძოდ საარჩევნო მოხელეების მეთვალყურეობით, დაინტერესებული პირები თავად გაივლიან ხმის მიცემის პროცედურებს (საცდელი წრის გაფერადება, ბიულეტენზე წრის გაფერადება, ფარულობის უზრუნველყოფის მიზნით ჩარჩო-კონვერტში ბიულეტენის მოთავსება, ხმის მთვლელ აპარატში (ყუთში) ბიულეტენის მოთავსება), მიიღებენ დეტალურ ინფორმაციას როგორც უშუალოდ საარჩევნო აპარატების გამოყენების, ისე საქართველოში საპილოტე რეჟიმში ჩატარებული ელექტრონული არჩევნების შესახებ", - წერს ადმინისტრაცია.

მათივე განმარტებით, პროექტი მთელი ქვეყნის მასშტაბით 64 მუნიციპალიტეტში, თბილისსა და რეგიონებში მუნიციპალიტეტების ადმინისტრაციულ ცენტრებში მდებარე წინასწარ განსაზღვრულ 89 ლოკაციაზე ჩატარდება.

მონაწილეობის მსურველებმა, 2024 წლის 26 ივნისიდან, ცესკოს ვებ გვერდზე ელექტრონული რეგისტრაცია უნდა გაიარონ და სასურველი თარიღი, დრო უნდა აარჩიონ. საარჩევნო ადმინისტრაცია ამომრჩევლებს მოუწოდებს, მონაწილეობა მიიღონ საარჩევნო ტექნოლოგიების საყოველთაო დემონსტრირების პროცესში და გაეცნონ საარჩევნო ტექნოლოგიებს.

ინფორმაციისთვის, 2024 წლის საპარლამენტო და ყველა შემდგომი არჩევნები ახალი ტექნოლოგიების გამოყენებით ჩატარდება და ამომრჩეველთ, თითქმის, 90% საარჩევნო ტექნოლოგიების გამოყენებით მიიღებს არჩევნებში მონაწილეობას. იცვლება ამომრჩევლის ვერიფიკაციის (რეგისტრაციის) და ხმის მიცემის პროცედურებიც.