აფხაზი ლიდერი, ასლან ბჟანია, რომელიც აქტიურად ლობირებს „აპრტამენტების“ შესახებ კანონპროექტს, მისი მიღების ერთ - ერთ მთავარ არგუმენტად აფხაზეთის გაზიფიკაციას ასახელებს. ამის შესახებ აფხაზური ინტერნეტგამოცემა „ნუჟნაია გაზეტა“ წერს.

„ჩვენ გვაქვს გეგმები აფხაზეთის გაზიფიცირებასთან დაკავშირებით. მომხმარებლები უკვე გვეყოლება. ესეც ბიზნესია, თუ გაზპრომი შემოდის მშენებლობით, მას გაყიდვები უნდა ჰქონდეს და ხარჯების ანაზღაურების შესაძლებლობა. სწორედ ეს იქნება ის ხალხი... პოტენციური მომხმარებლები. ასე მოგვარდება ეს საკითხი“, - განაცხადა ბჟანიამ.

გამოცემის თანახმად, რუსი ბიზნესმენების ინტერესებში არა ოჩამჩირე, გალი და ტყვარჩელი, არამედ „აფხაზეთის სანაპირო ზოლი შედის, კოდორიდან რუსეთ - აფხაზეთის საზღვრამდე“.

„გაზპრომს სჭირდება კლიენტები და ამისთვის ქვეყნის პრეზიდენტმა გადაწყვიტა აფხაზეთში დიდი რაოდენობით ხალხი ჩაასახლოს“, - ვკითხულობთ მასალაში. 

ცოტა ხნის წინ, ბჟანიამ ოჩამჩირეში გასვლითი თათბირი გამართა, რომელზეც აღნიშნა, რომ „აპარტამენტების“ შესახებ კანონის მიღება, „ოჩამჩირის, ტყვარჩელის და გალის რეგიონების სოციალურ-ეკონომიკური განვითარებისთვის გადაუდებელ აუცილებლობას წარმოადგენს" 

აფხაზეთის დე ფაქტო რესპუბლიკის “პარლამენტის“ ეკონომიკური პოლიტიკისა და რეფორმების კომიტეტმა “აპარტამენტების” შესახებ კანონპროექტი 17 ივლისს მოიწონა. მისი განხილვა კანონპროექტის კრიტიკოსების პროტესტის ფონზე მიმდინარეობდა, აქციის მონაწილეებსა და სამართალდამცველებს შორის, რამდენჯერმე დაპირისპირებაც მოხდა.

მოგვიანებით აქციის მონაწილეებთსნ ე.წ. პარლამენტის თავმჯდომარე ლაშ აშუბა გამოვიდა, მან შეკრებილებს მიმართა და პირობა მისცა, რომ „აღნიშნული კანონპროექტის განსახილველად, „სხდომა რეგლამენტის შესაბამისად დაინიშნება და ყველა დაინტერესებულ მხარეს ამის შესახებ 5 დღით ადრე ეცნობება“.

სწორედ ასლან ბჟანიაა "აპარტ-ოტელებისა და აპარტამენტების სამართლებრივი მდგომარეობის მოწესრიგების შესახებ" კანონპროექტის ინიციატორი.

მის ინიციატივას მწვავედ აკრიტიკებენ, როგორც ადგილობრივი ოპოზიციური პარტიები, ასევე საზოგადოებრივი ორგანიზაციები. ოპონენტები მიიჩნევენ, რომ ეს არის რუსეთისთვის უძრავი ქონების გადაცემის ფარული ფორმა.

ბჟანიას "ადმინისტრაციის" მიერ მომზადებული კანონპროექტის მიხედვით, 10-12 წლის განმავლობაში აფხაზეთის მთელ ტერიტორიაზე უნდა აშენდეს აპარტ-ოტელები, ჯამში 30 ათასი აპარტამენტით (ერთ რაიონში არაუმეტეს 5 ათასისა).

ინფორმაციისთვის, აფხაზეთის დე ფაქტო რესპუბლიკის ე.წ. პარლამენტმა 2023 წლის 27 დეკემბერს, გამთენიისას, მოახდინა ბიჭვინთის აგარაკების შესახებ შეთანხმების რატიფიცირება, იმავე დილას, ე.წ. პრეზიდენტმა ასლან ბჟანიამ "პარლამენტის" მიერ მიღებულ კანონებს ხელი მოაწერა და დაამტკიცა ბიჭვინთის ყოფილი სახელმწიფო აგარაკის რუსეთისთვის გადაცემა.