აფხაზი ოპოზიციონერი, პოლიტიკური პარტია „აფსნის“ თავმჯდომარე, ვიტალი გაბნია „აღმოსავლეთ აფხაზეთში" აპარტამანტების აშენების შესახებ აფხაზი ლიდერის ასლან ბჟანიას ინიციატივას გამოეხმაურა და მას მავნებლური უწოდა.

„ჩვენ გვეუბნებიან, რომ გალში ინვესტიციები შემოვა. გალი არანაირ რუსებს არ აინტერესებთ, გარდა ივანიშვილისა, რომელმაც გააცნობიერა, რომ აფხაზებთან ბრძოლა არ არის საჭირო. რომ აფხაზები თავად გაყიდიან ყველაფერს და არცთუ ისე ძვირად“, - დასძინა პოლიტიკოსმა.

გაბნია დარწმუნებულია, რომ ასლან ბჟანიაზე „არავინ ახორციელებს ზეწოლას მოსკოვიდან“ (აპარტამენტების საკითხზე), ის თავად ახორციელებს „უპრეცედენტო ზეწოლას დეპუტატებზე, სცილდება კონსტიტუციურ ჩარჩოებს“.

"ნუ გაგვწირავთ პალესტინის მსგავსი გზისთვის, რომელმაც მიწები ფულზე გაცვალა", - აღნიშნა გაბნიამ. 

უფრო ადრე, კიდევ ერთმა აფხაზმა ოპოზიციონერმა ლევან მიქაამ განაცხადა, რომ ივანიშვილს სურს შეიძინოს აფხაზური აქტივები ქართული წარმოშობის რუსი ოლიგარქების რესურსების გამოყენებით.

სწორედ ასლან ბჟანია არის, "აპარტ-ოტელებისა და აპარტამენტების სამართლებრივი მდგომარეობის მოწესრიგების შესახებ" კანონპროექტის ინიციატორი. 

ცოტა ხნის წინ, მან განაცხადა, რომ კანონის მიღება, ოჩამჩირის, ტყვარჩელის და გალის რეგიონების სოციალურ-ეკონომიკური განვითარებისთვის "გადაუდებელ აუცილებლობას წარმოადგენს" . 

აფხაზეთის დე ფაქტო რესპუბლიკის “პარლამენტის“ ეკონომიკური პოლიტიკისა და რეფორმების კომიტეტმა “აპარტამენტების” შესახებ კანონპროექტი 17 ივლისს მოიწონა.

მისი განხილვა კანონპროექტის კრიტიკოსების პროტესტის ფონზე მიმდინარეობდა, აქციები გაიმართა სოხუმსა და ოჩამჩირეში.

ბჟანიას "ადმინისტრაციის" მიერ მომზადებული კანონპროექტის მიხედვით, 10-12 წლის განმავლობაში ოკუპირებული აფხაზეთის მთელ ტერიტორიაზე უნდა აშენდეს აპარტ-ოტელები, ჯამში 30 ათასი აპარტამენტით (ერთ რაიონში არაუმეტეს 5 ათასისა). მის ინიციატივას მწვავედ აკრიტიკებენ, როგორც ადგილობრივი ოპოზიციური პარტიები, ასევე საზოგადოებრივი ორგანიზაციები. ოპონენტები მიიჩნევენ, რომ ეს არის რუსეთისთვის უძრავი ქონების გადაცემის ფარული ფორმა.

ინფორმაციისთვის, აფხაზეთის დე ფაქტო რესპუბლიკის ე.წ. პარლამენტმა 2023 წლის 27 დეკემბერს, გამთენიისას, მოახდინა ბიჭვინთის აგარაკების შესახებ შეთანხმების რატიფიცირება, იმავე დილას, ე.წ. პრეზიდენტმა ასლან ბჟანიამ "პარლამენტის" მიერ მიღებულ კანონებს ხელი მოაწერა და დაამტკიცა ბიჭვინთის ყოფილი სახელმწიფო აგარაკის რუსეთისთვის გადაცემა.

გასული წლის ოქტომბერში ბჟანიამ განაცხადა, რომ ოჩამჩირის რაიონში რუსული სამხედრო-საზღვაო ფლოტის მუდმივი ბაზის განთავსება იგეგმება.