აფხაზეთის დე ფაქტო რესპუბლიკის პრეზიდენტის განცხადებით, „აფხაზეთის მოქალაქეობის“ არმქონე მოქალაეებს შეუძლით შეიძინონ ნებისმიერი კომერციული უძრავი ქონება აფხაზეთში, შეზღუდვები ვრცელდება მხოლოდ საცხოვრებელ უძრავ ქონებაზე.
ამის შესახებ ასლან ბჟანიამ ტელეკომპანია „როსია 24“- ისთვის მიცემულ ინტერვიუში ისაუბრა.

მისი თქმით, სოხუმი სწავლობს მეზობელი ქვეყნების გამოცდილებას, რათა თავი აარიდოს მათ მიერ დაშვებულ შეცდომებს.

„ეს საკითხი გადაწყვეტას და პროფესიონალურ მიდგომას მიდგომას მოითხოვს. ეს არის გზა, რომელსაც ჩვენ მივყვებით. რუსეთის ფედერაციის მოქალაქეები ჩვენთვის ახლობელი, ძვირფასი ხალხია. ჩვენ განსაკუთრებული ურთიერთობა გვაქვს რუსეთის ფედერაციასთან და, რა თქმა უნდა, ხელს შევუწყობთ საკითხებს, რომლებიც დააახლოებს ჩვენს პოზიციებს, საკითხებს, რომლებიც ხელს შეუწყობს ჩვენი ეკონომიკის განვითარებას, აფხაზეთისა და მისი მოქალაქეების ინტერესებიდან გამომდინარე, აფხაზეთსა და რუსეთს შორის მოკავშირეობისა და ძმობის სახელით“, - განაცხადა მან.

ამასთან ერთად, ბჟანიას არ უხსენებია „აპარტამენტების“ შესახებ კანონპროექტის ე.წ. პარლამენტიდან უკან გაწვევის შესახებ, თუმცა, მან მიუთითა „მთავრობის მნიშვნელოვანი გადაწყვეტილებების მიღებასთან დაკავშირებით“ აფხაზური ოპოზიციის არგუმენტებზე.

„ჩვენს ოპონენტებს არგუმენტები არ აქვთ. ამ ოპონენტების მნიშვნელოვანი ნაწილი აფხაზეთის ლიდერები იყვნენ და მაშინ მათ მხარი დაუჭირეს ამ იდეას. ამ საკითხს რუსეთის ფედერაციის ხელმძღვანელობა 2008 წლიდან აყენებს და სამართლიანადაც“, - დასძინა მან.

ბჟანიამ ასევე მიანიშნა „უცხოური დაზვერვის სამსახურების დესტრუქციულ საქმიანობაზე“, რასთან დაკავშირებითაც, მისი თქმით, „მატერიალური მტკიცებულებების მოპოვება ძალიან რთულია“.

აფხაზეთის დე ფაქტო რესპუბლიკის ე.წ. პარლამენტმა 25 ივლისს უკან გაიწვია „აპარტამენტების“ კანონი. საუბარია დოკუმენტზე, რომელიც გალის, ოჩამჩირის და ტყვარჩელის რაიონებში 10 ათასამდე ბინის მშენებლობას ითავლისწინებდა.

სწორეს ასლან ბჟანია არის "აპარტ-ოტელებისა და აპარტამენტების სამართლებრივი მდგომარეობის მოწესრიგების შესახებ" კანონპროექტის ინიციატორი, რომელსაც ის აქტიურად ლობირებს.

აფხაზეთის დე ფაქტო რესპუბლიკის “პარლამენტის“ ეკონომიკური პოლიტიკისა და რეფორმების კომიტეტმა “აპარტამენტების” შესახებ კანონპროექტი 17 ივლისს მოიწონა.

მისი განხილვა კანონპროექტის კრიტიკოსების პროტესტის ფონზე მიმდინარეობდა, აქციები გაიმართა სოხუმსა და ოჩამჩირეში.

ბჟანიას "ადმინისტრაციის" მიერ მომზადებული კანონპროექტის მიხედვით, 10-12 წლის განმავლობაში ოკუპირებული აფხაზეთის მთელ ტერიტორიაზე უნდა აშენდეს აპარტ-ოტელები, ჯამში 30 ათასი აპარტამენტით (ერთ რაიონში არაუმეტეს 5 ათასისა).

მის ინიციატივას მწვავედ აკრიტიკებენ, როგორც ადგილობრივი ოპოზიციური პარტიები, ასევე საზოგადოებრივი ორგანიზაციები. ოპონენტები მიიჩნევენ, რომ ეს არის რუსეთისთვის უძრავი ქონების გადაცემის ფარული ფორმა.

ცოტა ხნის წინ, აფხაზმა ოპოზიციონერმა, პოლიტიკური პარტია „აფსნის“ თავმჯდომარემ, ვიტალი გაბნიამ განაცხადა, რომ გალი „არანაირ რუსებს არ აინტერესებთ, გარდა ბიძინა ივანიშვილისა“. კიდევ ერთი აფხაზი ოპოზიციონერის ლევან მიქაას მტკიცებით, „ივანიშვილს სურს შეიძინოს აფხაზური აქტივები ქართული წარმოშობის რუსი ოლიგარქების რესურსების გამოყენებით“.

ინფორმაციისთვის, აფხაზეთის დე ფაქტო რესპუბლიკის ე.წ. პარლამენტმა 2023 წლის 27 დეკემბერს, ბიჭვინთის აგარაკების შესახებ შეთანხმების რატიფიცირება მოახდინა. იმავე დღეს ე.წ. პრეზიდენტმა ასლან ბჟანიამ დაამტკიცა ბიჭვინთის ყოფილი სახელმწიფო აგარაკის რუსეთისთვის გადაცემა.

გასული წლის ოქტომბერში ბჟანიამ განაცხადა, რომ ოჩამჩირის რაიონში რუსული სამხედრო-საზღვაო ფლოტის მუდმივი ბაზის განთავსება იგეგმება.

საქართველოს აფხაზეთისა და ცხინვალის რეგიონები რუსეთმა 2008 წლის აგვისტოს ომის შემდეგ დამოუკიდებელ ქვეყნებად აღიარა, იმავე წლის სექტემბერში ნიკარაგუამ ცნო აფხაზეთის დამოუკიდებლობა, 2009 კი ვენესუელამ და ნაურუმ, ხოლო 2018 წელს - სირიამ.