ზუგდიდის მუნიციპალიტეტის მერმა და "ქართული ოცნების" ზუგდიდის საარჩევნო შტაბის ხელმძღვანელმა მამუკა წოწერიამ ბრიფინგი გამართა, რომელზეც თქვა, რომ "ერთიანობა - ნაციონალური მოძრაობის" წარმომადგენლებს საარჩევნო გარემოში დესტრუქცია შემოაქვთ.

მისივე მტკიცებით, საარჩევნო კამპანიაში ჩართული არიან ჯგუფები, რომლებსაც არჩევნების დღეს და წინასაარჩევნო პერიოდში აქვთ კონკრეტული დავალებები.

"მათი წარმომადგენლები ინტენსიურად უკავშირდებიან მოქალაქეებს როგორც სოფლებში, ასევე ქალაქში, ართმევენ პირადობის მოწმეობებს და სთავაზობენ, რომ 200 ლარის სანაცვლოდ, ეს ქმედება "ქართული ოცნების" წარმომადგენლებს გადააბრალონ.

გარდა ამისა, საარჩევნო კამპანიაში უკვე ჩართეს ყოფილი ხელისუფლების ზონდერ ჯგუფები, რომლებსაც არჩევნების დღეს და წინასაარჩევნო პერიოდში აქვთ კონკრეტული დავალებები. მოგიყვებით კონკრეტულ მაგალითზე. წუხელ, სოფელ რიყეში, 80 წლის შვილმკვდარ დედასთან მივიდნენ და 200 ლარის სანაცვლოდ შესთავაზეს პირადობა მიეცა და კამერებთან ეთქვა, რომ ის "ოცნების" წარმომადგენლებმა ჩამოართვეს, იგივე ფაქტი დაფიქსირდა ყულიშკარში, ჯიხაშკარსა და დევნილთა დასახლებაში ბარამიას ქუჩაზე", - ამბობს წოწერია.

მისივე თქმით, ხელისუფლების ოპონენტები მხოლოდ "ფეიკ ნიუსებზე" მუშაობენ და ცდილობენ, შექმნან ისეთი გარემო, სადაც თითქოს წინასაარჩევნო კამპანია მნიშვნელოვანი დარღვევებით მიმდინარეობს.

წოწერიას განცხადებით, "ქართული ოცნება" მოუწოდებს ყველა სადამკვირვებლო საერთაშორისო ორგანიზაციას, შეისწავლონ ოპოზიციური პარტიების ქმედებები და დააფიქსირონ დარღვევები.