"ქართული ოცნება" ეხმაურება სოციალურ ქსელში გავრცელებულ ინფორმაციას, რომ გუშინ, გვიან ღამით, ზუგდიდში სცენის კონსტრუქციის დაშლისას ადამიანი გადმოვარდა და გარდაიცვალა. პარტიაში ამას გამაოგნებელ და სამარცხვინო ტყუილს უწოდებენ.

"გვსურს გამოვეხმაუროთ "ნაციონალური მოძრაობის" ლიდერის, გიორგი მუმლაძის მიერ გავრცელებულ გამაოგნებელ ტყუილს, თითქოს ზუგდიდში, სცენის კონსტრუქციის დაშლისას ადამიანი გადმოვარდა და გარდაიცვალა. თანაც, ამ სამარცხვინო და არაადამიანური ტყუილის მიზანი პარტიის საპატიო თავმჯდომარესთან, ბიძინა ივანიშვილთან დაკავშირების მცდელობაა. იმდენად არის გაოგნებული რადიკალური ოპოზიცია ზუგდიდში, "ქართული ოცნების" მიერ ჩატარებული შთამბეჭდავი შეხვედრით, რომ მსგავსი ბინძური მეთოდით ცდილობენ საზოგადოების შეცდომაში შეყვანას. გარდა იმისა, რომ ნაცმოძრაობის ლიდერის მიერ გავრცელებული ტყუილი არის ბინძური პროვოკაცია, ჩვენ ამ სიცრუეს განვიხილავთ წინასაარჩევნო პროცესზე მავნე ზეგავლენის მოხდენის მცდელობად. ამიტომ მოვუწოდებთ სადამკვირვებლო მისიებს, დაუყოვნებლივ ასახონ თავიანთ ანგარიშებში მუმლაძის მიერ გავრცელებული დეზინფორმაცია", - ვკითხულობთ "ქართული ოცნების" პრეს-სამსახურის განცხადებაში.

ცნობისთვის, 15 ოქტომბერს, ზუგდიდის ცენტრალურ მოედანზე "ქართული ოცნების" წინასაარჩევნო შეხვედრა გაიმართა, სადაც პარტიის ლიდერებმა და საპატიო თავმჯდომარემ ბიძინა ივანიშვილმა სამეგრელო-ზემო სვანეთის მოსახლეობას მიმართეს. ქალაქში, ბულვარის მიმდებარე ტერიტორიაზე კი უკვე მე-4 დღეა, ავტომობილების მოძრაობა შეზღუდულია.