სოფელ ინგირში ზუგდიდის 67-ე საარჩევნო ოლქის 41-ე უბანი დილის 6 საათსა და 45 წუთზე გაიხსნა. უბნის კომისიის თავმჯდომარემ ხათუნა ჯგერენაიამ გვითხრა, რომ კომისიის ყველა წევრი ადგილზე დროულად მივიდა, გარდა ერთისა, რომელიც, მისივე თქმით, სავარაუდოდ, არ გამოცხადდება.

მისი ინფორმაციით, საარჩევნო პროცედურები პროტოკოლის მიხედვით, დარღვევების გარეშე ჩატარდა.

როგორც კი 08:00 საათი შესრულდა, აღნიშნულ უბანზე პირველმა ამომრჩეველმა ხმა დაუბრკოლებლად მისცა.

ერთ-ერთმა პირველმა მოქალაქემ, რომელმაც ხმა დილის 08 საათსა და 7 წუთზე მისცა რადიო "ათინათთან" თქვა, რომ ხმა ევროპულ მომავალს და კეთილდღეობის სახელმწიფოს მისცა.

ინგირის 41-ე საარჩევნო უბანზე რეგისტრირებულია 2443 ამომრჩეველი.

საქართველოში საპარლამენტო არჩევნები მიმდინარეობს. საქართველოს ისტორიაში პირველად, ქვეყნის მოქალაქეები პარლამენტის 150 დეპუტატს მხოლოდ პროპორციული სისტემით ირჩევენ.

საქართველოში საპარლამენტო არჩევნები პირველად იმართება ელექტრონული ტექნოლოგიების გამოყენებით. ამ წესით ამომრჩევლები ხმას მისცემენ 90%-ზე მეტ საარჩევნო უბანში. 26 ოქტომბრის არჩევნებისთვის ამომრჩეველთა საერთო რაოდენობა 3 508 294-ს შეადგენს. 26 ოქტომბრის არჩევნებისთვის ამომრჩეველთა საერთო რაოდენობა 3 508 294-ია. ელექტრონული ტექნოლოგიების გამოყენებით ხმას მისცემს 3 113 747. გადასატანი ყუთის სიაში 64 238 ამომრჩეველია.
უცხოეთის სახელმწიფოებში შექმნილი საარჩევნო უბნების სპეციალურ სიებშია 95 910 ამომრჩეველი.

2024 წლის 14 ოქტომბრის მდგომარეობით, ზუგდიდის 67-ე საარჩევნო ოლქში 116 968 ამომრჩეველია რეგისტრირებული.