ჩხოროწყუს მუნიციპალიტეტში, მდინარე ხობისწყალზე მდებარე "ხობი 2 ჰესი" დღეს ოფიციალურად გაიხსნა. ღონისძიებას საქართველოს პრემიერ-მინისტრი, ეკონომიკის მინისტრი, მთავრობისა და ადგილობრივი ხელისუფლების წარმომადგენლები ესწრებოდნენ.

ეკონომიკისა და მდგრადი განვითარების მინისტრის ლევან დავითაშვილის განცხადებით, სადგურის დადგმული სიმძლავრე 44,5 მეგავატია, ელექტრო ენერგიის გამომუშავება კი 200 მლნ კვტ სთ-ს გადააჭარბებს.

"დღეს, მართლაც ერთ-ერთი გამორჩეული ენერგეტიკული პროექტი შედის ექსპლუატაციაში, რომელსაც სამინისტრო წლების განმავლობაში ცდილობდა დახმარებოდა. საქართველოს ენერგეტიკულ სისტემას ახალი მნიშვნელოვანი სიმძლავრე შეემატა. ახალი ჰიდროელექტროსადგურის სიმძლავრე არის 44 მეგავატზე მეტი. ეს ერთ-ერთი ყველაზე დიდი სიმძლავრის ჰიდროელექტრო სადგურია, რაც დამოუკიდებელი საქართველოს ისტორიაში შეიქმნა. 2012 წლიდან დღემდე, საქართველოს ენერგეტიკულ სისტემას 1150 მეგავატზე მეტი სიმძლავრე დაემატა. გამომუშავება 200 მლნ კვტ.სთ-ს გადააჭარბებს და ეს ჩვენი ენერგო დამოუკიდებლობისთვის კიდევ ერთი წინ გადადგმული ნაბიჯია.

ჩვენი ხედვაა, რომ საქართველოს ენერგორესურსები მაქსიმალურად უნდა ავითვისოთ. საქართველოს გააჩნია განახლებადი წყაროებიდან ელექტროენერგიის მიღების მნიშვნელოვანი საშუალებები", - თქვა მინისტრმა ღონისძიებაზე.

ცნობისთვის, ჰიდროელექტროსადგურის პირველი ფაზისთვის ინვესტიციის მოცულობა 250 მლნ ლარზე მეტს შეადგენს. სადგურის მშენებლობაზე დასაქმებული 500 ადამიანი იყო. სამუშაოები კი კომპანია "ფერიმ" შეასრულა.