„სამართლიანი არჩევნების“ დირექტორის ნინო დოლიძის განცხადებით, არჩევნების დღეს, ორგანიზაციამ ჯამში 490 ინციდენტი და დარღვევა აღრიცხა, როგორც ქვეყნის შიგნით, ისე საქართველოს საზღვრებს გარეთ გახსნილ საარჩევნო უბნებში.

მისივე თქმით, კენჭისყრის შენობაში გამოვლენილი დარღვევებია (323): ბიულეტენების ჩაყრა (2); მრავალჯერადი ხმის მიცემა/ხმის მიცემის მცდელობა (12); დამკვირვებლის უფლებების უკანონო შეზღუდვა/გაძევება(30); მარკირების პროცედურის წესის დარღვევა (76); ხმის ფარულობის დარღვევა (76); გადასატან საარჩევნო ყუთთან დაკავშირებული დარღვევები (22); ელექტრონულ ტექნოლოგიებთან დაკავშირებული ხარვეზები (17); სხვა დარღვევები (62); საზღვარგარეთ შექმნილ უბნებში გამოვლენილი პრობლემები (26).

ორგანიზაციის შეფასებით, საარჩევნო უბნის გარე პერიმეტრზე გამოვლენილია 167 ინციდენტი/დარღვევა. კერძოდ, კოორდინატორთა მიერ ამომრჩეველთა აღრიცხვა (71- საარჩევნო უბნების 31%); სიტყვიერი და ფიზიკური დაპირისპირების, ასევე, მუქარის ფაქტები საარჩევნო უბნების (25 - საარჩევნო უბნების 11%); ამომრჩეველთა ორგანიზებული ტრანსპორტირება (42 - საარჩევნო უბნების 19%); ამომრჩეველთა სავარაუდო მოსყიდვა (29 - საარჩევნო უბნების 13%).

დოლიძე აღნიშნავს, რომ 2024 წლის საპარლამენტო არჩევნების წინასაარჩევნო პერიოდში და არჩევნების დღეს გამოვლენილი ფუნდამენტური ხასიათის დარღვევების ერთობლიობამ გავლენა მოახდინა ამომრჩევლის თავისუფალი ნების გამოვლენაზე და, შესაბამისად, არჩევნების შედეგები ვერ განიხილება, როგორც საქართველოს ამომრჩევლის ნების გამოხატულება.

„სამართლიანი არჩევნების“ სადამკვირვებლო მისიაში ჩართული იყო: 1,000-მდე მოკლევადიანი დამკვირვებელი უბნის შიგნით, 231 დამკვირვებელი უბნის გარე პერიმეტრზე, 73 საოლქო საარჩევნო კომისიის დამკვირვებელი, 85 მობილურ ჯგუფი, 23 იურისტი და 32 ოპერატორი, რომლებიც ფარავდნენ 73 საარჩევნო ოლქს.