სამეგრელო-ზემო სვანეთის სამხარეო ადმინისტრაციის ფასადზე სამოქალაქო აქტივისტებმა ბანერი წარწერით "გაჟონილია" გადმოფინეს. ამის შესახებ რადიო "ათინათს" პარტია "დროას" რეგიონულმა წარმომადგენელმა და აქტივისტმა მარიამ სიჭინავამ უთხრა.

მისი თქმით, წარწერა ეხება არჩევნებში ხმის მიცემის ფარულობის დარღვევას, რომელიც არასამთავრობო ორგანიზაციებმა სასამართლოში გაასაჩივრეს.

"გაჟონილია ეხება საარჩევნო ბიულეტენებს, რომლებზეც ამომრჩევლის არჩევანი ფურცლის მეორე მხარეს ჩანდა. შესაბამისად, ერთ-ერთი მთავარი პრინციპი დაირღვა. ამის აღიარება ქართულ ოცნებას არ უნდა. სასამართლო სისტემა მათ ხელშია და დარჩა ერთი გზა, ვებრძოლოთ ამ სისტემას ქუჩიდან. დღეს, ქუჩაა ის გზა, რითაც შეგვიძლია არჩევნები დავიბრუნოთ", - ამბობს ის.

როგორც ის განმარტავს, წარწერის გადმოფენა პროტესტის ერთ-ერთი ფორმა იყო და ის გაგრძელდება პერმანენტულად.

ცნობისთვის, დღეს დილიდან ზუგდიდის ცენტრალური ქუჩებში სხვადასხვა წარწერა გამოჩნდა. ფერადი საღებავებით შესრულებულ წარწერებს შორისაა - ,,არჩვენები მოპარულია"", ,,რევოლუცია"", ,,აჯანყდი"" და ა.შ.

შეგახსენებთ, ქუთაისის სააპელაციო სასამართლომ არასამთავრობო ორგანიზაციების "საერთაშორისო გამჭვირვალობა - საქართველოს" და ,,ჩემი ხმის'' წარმომადგენლების საჩივრები, რომლებიც ზუგდიდის, სენაკისა, ფოთის, ბათუმისა და ქუთაისის ცალკეულ უბნებზე 26 ოქტომბრის არჩევნების ხმის ფარულობის დარღვევას ეხებოდა არ დააკმაყოფილა.