ოჩამჩირეში საკონტეინერო ტერმინალის მშენებლობა 15 ნოემბრამდე დასრულდება. ამის შესახებ აფხაზეთის დე ფაქტო რესპუბლიკის ეკონომიკის მინისტრის მრჩეველმა, ოქტაი ჰაზირიშმა პროპაგანდისტულ გამოცემა Sputnik- ს განუცხადა.

„სამუშაო პროცესი საბოლოო სტადიას უხალოვდება. შეიძლება ითქვას, რომ მხოლოდ 350 კუბური მეტრი ბეტონისა და ღობის პერიმეტრის მოწყობა დარჩა“, - აღნიშნა მან. 

ჰაზირიშის განმარტებით, მშენებლობა მიმდინარეობს შეღავათიანი დაკრედიტების საინვესტიციო პროგრამის ფარგლებში, რომელსაც სოხუმი მოსკოვის თანადაფინანსებით ახორციელებს.

„ჩვენ კონტეინერის გადამზიდავ ოპერატორ კომპანიებთან კონტრაქტები გავაფორმეთ. ახლა ამ მიმართულებით მიდის მუშაობა. უცხოური კომპანიები დიდ ინტერესს იჩენენ ინფრასტრუქტურის ამ შესაძლებლობის მიმართ. ახლა ნომერ პირველი ამოცანაა ობიექტის ექსპლუატაციაში ჩაშვება. ჩვენი პარტნიორები ამას ელოდებიან. ამის შემდეგ უშუალოდ საქონლის და კონტეინერების გადაზიდვა დაიწყება", - განაცხადა მან

გავრცელებული ინფორმაციით, ობიექტი 250 მეტრი სიგრძისა და 500 მეტრი სიგანის პლატფორმას წარმოადგენს, რომელიც აღჭურვილია სარკინიგზო ლიანდაგებით და ვაგონების გადმოტვირთვის ზონით. ტერიტორიაზე შექმნილია 1200 კონტეინერზე გათვლილი გადაზიდვა - შენახვის ზონები.

ტერმინალის ამოქმედების შემდეგ, 300 კონტეინერის ტევადობის ხომალდების დატვირთვა გახდება შესაძლებელი.

2024 წლის ივლისში, აფხაზურ მედიაში გავრცელდა ინფორმაცია, რომ ოჩამჩირეში, პორტის მიმდებარე ტერიტორიაზე, საკონტეინერო ტერმინალი შენდება, ე.წ. პრეზიდენტის ასლან ბჟანიას დავალებით, „საერთაშორისო სატრანსპორტო კორიდორის განვითარებისთვის“.

გასული წლის ოქტომბერში ბჟანიამ დააანონსა, ოჩამჩირის რაიონში რუსული სამხედრო-საზღვაო ფლოტის მუდმივი ბაზის განთავსების შესახებ. 

ოკუპირებული აფხაზეთის „საგარეო საქმეთა მინისტრმა“ სერგეი შამბამ, მიმდინარე წლის აგვისტოში განაცხადა, რომ ოჩამჩირეში რუსული საზრვაო ფლოტის მუდმივი ბაზის განთავსება არ იგეგმება.