ზუგდიდის მერიამ მუნიციპალიტეტის ტერიტორიაზე მოხეტიალე და მიუსაფარი ძაღლების ცხოველთა თავშესაფარში განთავსებისთვის, ასევე, შესაბამისი ვეტერინარული მომსახურებისთვის, 20 000 ლარს დახარჯავს. ამის შესახებ სახელმწიფო შესყიდვების ვებ გვერდზე ვკითხულობთ.

სატენდერო დოკუმენტაციის მიხედვით, მიუსაფარი ცხოველების დაჭერა და თავშესაფარში გადაყვანა უნდა მოხდეს ჰუმანური, უმტკივნეულო მეთოდით, სპეციალური სატრანსპორტო საშუალების გამოყენებით.

ამასთან, გასაწევი მომსახურება ასევე ითვალისწინებს: დეჰელმენტიზაციას (დამუშავება ჭიებზე, გარე პარაზიტებზე), სტერილიზაცია/კასტრაციას, ვაქცინაციას, იდენტიფიკაციას (სპეციალური ძაღლისათვის განკუთვნილი ქარხნული დანომრილი საჭდით, ბირკით), სიცოცხლესთან შეუთავსებელი მდგომარეობის შემთხვევაში, მის ევთანაზიას (ევთანაზიის დროს უნდა შედგეს ვეტერინარი ექიმის მიერ შესაბამისი აქტი)

მიუსაფარი ძაღლის იზოლირებისას, თავშესაფარი ვალდებულია, ცხოველი მოგვიანებით პირვანდელ საცხოვრებელ ტერიტორიაზე ან ბუნებრივ არეალში დააბრუნოს.

ტენდერში წინადადებები 27 მარტიდან 2 აპრილის ჩათვლით მიიღება. გამარჯვებული კომპანია ვალდებული იქნება ხელშეკრულებით გათვალისწინებული მოთხოვნები, ეტაპობრივად, 2025 წლის 31დეკემბრის ჩათვლით.

ცნობისთვის, საქართველოს პარლამენტში2024 წლის 13 თებერვალს დაინიციირდა "შინაურ ბინადარ ცხოველთა შესახებ" კანონპროექტი, რომლის მიხედვითაც, შინაური ცხოველის მოვლა-პატრონობასთან დაკავშირებული ვალდებულებების დარღვევაზე ადმინისტრაციული პასუხისმგებლობა დაწესდებოდა. მის განმარტებით ბარათში აღნიშნული იყო, რომ მიუსაფარი ცხოველების მუნიციპალური თავშესაფრების აშენება სხვა ქალაქებთან ერთად სენაკსა და მესტიაშიც იგეგმება.

ზუგდიდის საკრებულომ მიუსაფარი "ზუგდიდის მუნიციპალიტეტის ტერიტორიაზე ბინადარი შინაური ცხოველების მოვლა-პატრონობის და მათი პოპულაციის მართვის წესი" 2023 წელს დაამტკიცა, რომელშიც მერიას კერძო სამართლის იურიდიული პირის (კომერციული) დაფუძნებისათვის ვადა 2024 წლის 1-ელ ივნისამდე, ხოლო თავშესაფრის მოსაწყობად 2025 წლის 1-ელ ივნისამდე განესაზღვრა.