კანონპროექტი, რომელიც მაუწყებლებს უცხოეთიდან დაფინანსების მიღებას უკრძალავს, საქართველოს პარლამენტმა მესამე, საბოლოო მოსმენით დაამტკიცა. მას მხარი „ქართული ოცნების“ 86-მა დეპუტატმა დაუჭირა. 

დოკუმენტის მიხედვით, მაუწყებლის მიერ სოციალურ რეკლამის განთავსების სანაცვლოდ პირდაპირი ან არაპირდაპირი დაფინანსების მიღება დაუშვებელი იქნება.

ასევე, იკრძალება მაუწყებლის მიერ უცხოური ძალისგან პირდაპირი ან არაპირდაპირი დაფინანსების - ფულადი თანხის ან ქონებრივი ღირებულების სხვა სახის მატერიალური სიკეთის მიღება (გარდა კომერციული რეკლამისა, ტელეშოპინგისა, სპონსორობისა და პროგრამაში პროდუქტის განთავსებისა), ასევე, უცხოური ძალის მიერ მაუწყებლის მომსახურების შესყიდვა (გარდა კომერციული რეკლამისა და პროდუქტის განთავსებისა) და პროგრამის მომზადების ან ეთერში გადაცემის პირდაპირი ან ირიბი დაფინანსება ან თანადაფინანსება.

„უცხოურ ძალად“ მიიჩნევა: - უცხო სახელმწიფოს ხელისუფლების სისტემის შემადგენელი სუბიექტი; ფიზიკური პირი, რომელიც საქართველოს მოქალაქე არ არის; იურიდიული პირი, რომელიც საქართველოს კანონმდებლობის საფუძველზე არ არის დაფუძნებული; ისეთი ორგანიზაციული წარმონაქმნი - მათ შორის, ფონდი, ასოციაცია, კორპორაცია, კავშირი, სხვა სახის ორგანიზაცია ან პირთა სხვა სახის ისეთი გაერთიანება, რომელიც უცხო სახელმწიფოს სამართლის ან საერთაშორისო სამართლის საფუძველზეა დაფუძნებული.

რაც შეეხება FARA-ს, კენჭისყრისას პარლამენტის თავმჯდომარემ შალვა პაპუაშვილმა განაცხადა, რომ “ამერიკული სტანდარტისა და ზუსტი ასლის კანონი მიღებულია“. მას “უცხოეთის აგენტების რეგისტრაციის აქტი“ დაერქვა.

კანონის პროექტით სუბიექტის უცხოეთის აგენტად რეგისტრაციის საკითხები წესრიგდება. კანონის აღსრულება კი, ანტიკორუფციულ ბიუროს დაევალება.

ამერიკული ანალოგისაგან განსხვავებით, ის ეხება დამოუკიდებელ სამოქალაქო ორგანიზაციებსა და მედიასაც.

FARA-ს მიზანია გააკონტროლოს უცხოური ძალის პირდაპირი გავლენა ადგილობრივ პოლიტიკაზე, როდესაც უცხოეთიდან დაფინანსებული პირები ავტონომიურად არ მოქმედებენ და სრულად ექვემდებარებიან პრინციპალის მითითებებს.

ამასთან, პარლამენტის გადაწყვეტილებით, დღეიდან სისხლის სამართლის კოდექსში „სამშობლოს ღალატის“ მუხლი დაბრუნდა, რომელიც 2007 წელს გაუქმდა. ამასთან, 15 მოქმედი კანონიდან ამოიღეს სიტყვა „გენდერი“.

მესამე მოსმენის შემდეგ პარლამენტი კანონს ხელმოსაწერად უგზავნის მიხეილ ყაველაშვილს. ხელმოწერის შემდეგ, "საკანონმდებლო მაცნეში" გამოქვეყნდება და იმ დღიდან ამოქმედდება.