ადამიანის უფლებათა ევროპული სასამართლო 14 ივნისს გამოაქვეყნებს გადაწყვეტილებას საქმეზე "მერაბიშვილი საქართველოს წინააღმდეგ”. ამის შესახებ ინფორმაციას სტრასბურგის სასამართლო ავრცელებს.

მერაბიშვილი საქართველოს ადამიანის უფლებათა დაცვის კონვენციის მე-5 თავის რამდენიმე პუნქტის და მე-18 მუხლების დარღვევაში ადანაშაულებს და აცხადებს, რომ 2013 წლის 22 მაისს მიღებული გადაწყვეტილება აღმკვეთ ღონისძიებად პატიმრობის შეფარდებაზე ეფუძნება გაუგებარ სამართლებრივ წესს.

საქმე ეხება საქართველოს ყოფილი პრემიერ-მინისტრის ვანო მერაბიშვილის საჩივარს მის წინააღმდეგ აღმკვეთ ღონისძიებად პატიმრობის გამოყენებასთან დაკავშირებით. ყოფილი პრემიერი მის დაპატიმრებას პოლიტიკურად მოტივირებულად მიიჩნევს და აცხადებს, რომ ხელისუფლებამ ამ გზით ის, როგორც ”ერთიანი ნაციონალური მოძრაობის“ ერთ-ერთი ლიდერი, ჩამოაშორა პოლიტიკურ პროცესებს და შესაძლებლობა არ მისცა 2013 წლის საპრეზიდენტო არჩევნებში მონაწილეობა მიეღო.

ვანო მერაბიშვილის წინააღმდეგ რამდენიმე სისხლის სამართლის საქმეა აღძრული, რომლებზეც უზენაესი სასამართლოს გადაწყვეტილებები ჯერ არ მიუღია.