ფოთის ჰოსპიტალში, ბოქსირებულ განყოფილებაში მოთავსებულ 38 წლის ქალს, კორონავირუსი არ დაუდასტურდა. მას ინფიცირებულ სპორტსმენთან ჰქონდა კონტაქტი. პაციენტი საკარანტინო სივრციდან, მწვავე რესპირატორული სიმპტომებით წუხელ გადმოიყვანეს.

„დღეს 4 ადამიანი გადავიყვანეთ კარატნში. ესენი არინ აზერბაიჯანიდან და სოხეთიდან ჩამოსული ტრაილერის მძღოლები, 35-დან 50 წლამდე ასაკის. მათ არანაირი სიმპტომები არ აღენიშნებათ, უბრალოდ, ოჯახში არ ჰქონდათ საიზოლაციო პირობები და მეტი სიფრთხილისთვის ანაკლიის საკარანტინო სივრცეში გადავიყვანეთ. ბოლო მონაცემებით, თვითიზოლაციაში 9 და კარანტინშიც 9 ადამიანი გვყავს. თითოეულის მდგომარეობა დამაკმაყოფილებელია“,-განაცხადა საზოგადოებრივი ჯანდაცვის ცენტრის დირექტორის მოადგილემ ზინაიდა გაგუამ.

საზოგადოებრივი ჯანდაცვის ცენტრის ინფორმაციით,ფოთში, ამჟამად თვითიზოლაციასა და კარანტინშიც 9-9 პირი იმყოფება, მათი ჯანმრთელობის მდგომარეობა დამაკმაყოფილებელია.

ახალგაზრდა სპორტსმენს, რომელმაც სამეგრელოს რამდენიმე მუნიციპალიტეტში იმოგზაურა, ახალი კორონავირუსი 4 აპრილს დაუდგინდა. ზემოაღნიშნული პირის კლასტერიდან ანაკლიის საკარანტინო ზონაში 23 პირია  გადაყვანილი. სულ დადგენილია მისი 77 კონტაქტი.