15 მარტიდან ზუგდიდში მედპერსონალის კორონავირუსზე ვაქცინაციის პროცესი 2 ლოკაციაზე დაიწყება. როგორც რადიო "ათინათს" დაავადებათა კონტროლის ეროვნული ცენტრის სამეგრელო-ზემო სვანეთის ხელმძღვანელმა ანზორ ქობალიამ უთხრა პირველ ეტაპზე ყველაზე მაღალი რისკის ქვეშ მყოფი მედპერსონალი აიცრება.

"ევექსის კლინიკებში ჩატარდება მედპერსონალის ვაქცინაცია ამ ეტაპზე, თანდათან ჩაერთვება ინფექციური და დევნილთა. გვექნება სია, დავიწყებთ ჯერ ვინც უფრო მაღალი რისკის ქვეშაა, მაგალითად კოვიდკლინიკებში მომუშავე პერსონალით. გვიან ჩამოგვაქვს დღეს ვაქცინები, ჯამში ჩვენს რეგიონში დაახლოებით 3 500 ადამიანი უნდა აიცრას, აქ შედის ექიმები, ექთნები, სხვა მედპერსონალი, რაც თანდათანობით მოხდება", - გვითხრა მან. 

ჯანდაცვის მინისტრმა ეკატერინე ტიკარაძემ დღეს გამართულ ბრიფინგზე საქართველში კორონავირუსის საწინააღმდეგო ვაქცინის პირველი პარტიის შემოსვლაზე ისაუბრა, მისი განმარტებით,  ქვეყანაში შერჩეულია 82 დაწესებულება, სადაც 15 მარტიდან დაიწყება ვაქცინაციის პროცესი. მინისტრის თქმით, ყველა დაწესებულებაში ჩატარებულია შესაბამისი ტრენინგი და შემოწმებულია შესაბამისი აღჭურვილობა.