საქართველოდან ექსპორტის მოცულობამ იანვარ-ოქტომბერში შარშანდელთან შედარებით 16 %-ით მოიმატა და 2 მილიარდ 306 მილიონ დოლარს მიაღწია. 2007 წლიდან დღემდე მისი მაჩვენებელი ზუსტად 2,3-ჯერ გაიზარდა. ამის შესახებ ინფორმაციას საქართველოს ეროვნული სტატისტიკის სამსახური ავრცელებს. სტატისტიკის ეროვნული სამსახურის ინფორმაციით, სასაქონლო ჯგუფებში პირველი ადგილი და მთლიანი ექსპორტის 25% კვლავ მსუბუქი ავტომანქანების რეექსპორტს უკავია. მისი მოცულობა შარშანდელთან შედარებით 15%-ით გაიზარდა და 568,7 მილიონი დოლარი შეადგინა. სამაგიეროდ, 15% -ით შემცირდა ფეროშენადნობების ექსპორტი 192,8 მილიონ დოლარამდე. მესამე ადგილზე სპილენძის მადნები და კონცენტრატებია, რომლის გაყიდვები საზღვარგარეთ 2,5-ჯერ გაიზარდა და 118,4 მილიონ დოლარს მიაღწია. 61-61% -ით მოიმატა თხილისა და მინერალური წყლების ექპორტმა და შესაბამისად, 177,7 მილიონი და 83,8 მილიონი დოლარი შეადგინა, ღვინის ექსპორტი კი შარშანდელთან გაორმაგდა 92,2 მილიონ დოლარამდე, რაც შეეხევა აზოტოვანი სასუქების რეალიზაციას, ის უცვლელი დარჩა - 110,8 მილიონი დოლარი. ქვეყნების მიხედვით, პირველ ადგილზე 582 მილიონი დოლარით აზერბაიჯანია (მასზე მთლიანი ექსპორტის 25,3% მოდის), მეორე ადგილზე 257 მილიონი დოლარით - სომხეთი (11,2%), მესამეზე 153 მილიონი დოლარით - თურქეთი (6,6%).