საქართველოს ჟურნალისტური ეთიკის ქარტია მისი არაწევრი ჟურნალისტების ეთიკური დარღვევების შესახებაც იმსჯელებს. ამ გადაწყვეტილების მისაღებად ქარტიამ ელექტრონული კენჭისყრა ჩაატარა, რომლის შედეგებიც 3 დეკემბერს გახდა ცნობილი. ქარტიის მანდატის გაფართოებას მხარი 197-მა წევრმა დაუჭირა მხარი, წინააღმდეგი კი - 21 ჟურნალისტი იყო. ცვლილებები ძალაში ქარტიის საერთო კრების ჩატარებისა და საბჭოს განახლებული შემადგენლობის არჩევის (21 დეკემბერი) შემდეგ შევა. ქარტიის საბჭო არაწევრი ჟურნალისტების მიმართ განცხადებებს საქმის წარმოების არსებული წესის მიხედვით განიხილავს. განხილვის წესში ერთი განსხვავება იქნება - არაწევრი ჟურნალისტის წინააღმდეგ განცხადების შეტანა ერთი თვის განმავლობაში იქნება შესაძლებელი, წევრის მიმართ კი უცვლელად დარჩება - სამი თვე. ვადის გასვლის შემდეგ ქარტია აღარ მიიღებს სადავო განცხადებას. ცვლილებების შესვლამდე ქარტია მხოლოდ მისი წევრი ჟურნალისტების დარღვევბზე შესულ საქმეებს განიხილავდა. არაწევრი ჟურნალისტების დარღვევებზე შესული საზოგადოებრივი ინტერესის მქონე საქმეების შესახებ კი მხოლოდ მოსაზრებების დაფიქსირებითა და რეკომენდაციებით შემოიფარგლებოდა. შეზღუდული მანდატი ქარტიის საბჭოს უფლებას არ აძლევდა გადაწყვეტილებები მიეღო მისი არაწევრი ჟურნალისტების მხრიდან პროფესიული ეთიკის უხეში დარღვევის ფაქტებზე. რეგიონალურ მაუწყებელთა ასოციაციის დირექტორი, ნათია კუპრაშვილი იმ 197 ჟურნალისტს შორისაა, რომლემაც ქარტიის მანდატის გაფართოებას დაუჭირა მხარი. მისი თქმით, ქვეყანაში არ არსებობდა მედიის თვითრეგულირების მექანიზმი, რომელიც მოქალაქეებს ეტყოდა დაარღვია მედიამ ეთიკური ნორმები თუ არა. ქარტიის გარდა ეთიკურ დარღვევებზე მოქალაქეებს შესაძლებლობა აქვთ მაუწყებლის თვითრებულირების მექანიზმში იჩივლონ, თუმცა იქაც შეზღუდვაა - იმისათვის რომ საქმე განიხილონ დაინტერესებული პირი უნდა იყო, ანუ სიუჟეტით ზიანი უშუალოდ მომჩივანს უნდა მიადგეს. კუპრაშვილის განმარტებით, ქარტიის წესდებაში შესული ცვლილებებით, შეზღუდვები იხსნება და ნებისმიერ მოქალაქეს ნებისმიერ ეთიკურ დარღვევაზე შეუძლია ქარტიას მიმართოს. „წესდებაში შესული ცვლილებები დადებით გავლენას იქონიებს მედია-გარემოზე და მედია-წიგნიერების გაზრდაზე. ეს მოგვცემს საშუალებას, ვთქვათ - სად ცდება მედია და სად არის მართალი“, - ამბობს კუპრეიშვილი. ქარტიის მანდატის გაფართოებას მხარი არ დაუჭირა გაზეთი „ბათუმელების“ რედაქტორმა, ეთერ თურაძემ. მისი თქმით, წესდებაში შესული ცვლილებებით დაირღვა ქარტიის შექმნის მთავარი პრინციპი - ნებაყოფლობითი შეთანხმება ეთიკურ პრინციპებზე. „შევთანხმდით, რომ ეს იყო ჩვენ მიერ აღიარებული პრინციპები, რაც ნებაყოფლობით უნდა დაგვეცვა - როგორც ჩანს, ამ პრინცპიების გადახედვა მოხდა. ვფიქრობ, რომ ქარტიამ გადაწყვეტილება კი არ უნდა გამოიტანოს არაწევრი ჟურნალისტების მიმართ, არამედ რეკომენდადიები მისცეს“, - აღნიშნავს  თურაძე. ქარტიამ წევრ ჟურნალისტებს 25 ნოემბერს ელექტრონულ კენჭისყრაში მონაწილეობა შესთავაზა. ჟურნალისტებს საკუთარი აზრის დასაფიქსირებლად 7 დღიანი ვადა ჰქონდათ. კენჭისყრაში მონაწილეობა უნდა მიეღო ქარტიის ხელმომწერი ჟურნალისტების უმრავლესობას (მინიმუმ ორ-მესამედს). მათ უმრავლესობასვე უნდა გადაეწყვიტა შევიდოდა თუ არა ქარტიის წესდებაში ცვლილება.   "media.ge"