საქართველო მზად არის,  შეასრულოს სატრანსპორტო დერეფნის ფუნქცია, - ამის შესახებ საქართველოს პრემიერ-მინისტრმა ირაკლი ღარიბაშვილმა შავი ზღვის საპარლამენტო ასამბლეის 42-ე სესიაზე განაცხადა , რომელსაც საქართველო, როგორც თავმჯდომარე ქვეყანა მასპინძლობს. ირაკლი ღარიბაშვილის თქმით, საქართველო გააუმჯობესებს სატრანსპორტო გარემოს, ითანამშრომლებს ეკოლოგიური უსაფრთხოების სფეროში, იქნება ენერგეტიკის მწარმოებელიც და გამტარიც, აგრეთვე ხელს შეუწყობს სავაჭრო ურთიერთობების გაღრმავებას წევრ ქვეყნებს შორის. "ჩვენთვის დიდი პატივია, რომ საქართველო შავი ზღვის ქვეყნების ეკონომიკური თანამშრომლობის თავმჯდომარე ქვეყანაა და საპარლამენტო ასამბლეის 42-ე სესიას მასპინძლობს. საქართველოსთვის მეტად მნიშვნელოვანი და საინტერესოა ამ ორგანიზაციაში გაწევრიანებულ ქვეყნებთან თანამშრომლობა, რადგან ეს ორგანიზაცია თითქმის სრულად მოიცავს ჩვენს გეოპოლიტიკურ არეალს. პირველ რიგში, მინდა აღვნიშნო, რომ საბედნიეროდ, ამ ორგანიზაციამ დროის გამოცდას გაუძლო და, მიუხედავად იმისა, რომ წევრ სახელმწიფოებს სხვადასხვა მიმართულებით აქვთ პრობლემები, ამ ორგანიზაციის ფარგლებში კვლავ ინტენსიური და ნაყოფიერი თანამშრომლობა მიმდინარეობს ეკონომიკურ, ინფრასტრუქტურულ და საფინანსო სფეროებში", - განაცხადა ღარიბაშვილმა. მისივე განმარტებით, მნიშვნელოვანია, გაგრძელდეს და მაქსიმალურად გაღრმავდეს ეს თანამშრომლობა და ურთიერთობები ორგანიზაციის წევრ ქვეყნებთან. "მეტად მნიშვნელოვანია ამ ორგანიზაციის სისტემაში საპარლამენტო კომპონენტის ჩართვა და გააქტიურება, რათა პოლიტიკურმა ძალებმაც აქტიური მონაწილეობა მიიღონ და თავიანთი წვლილი შეიტანონ ჩვენს ქვეყნებს შორის თანამშრომლობის საქმეში. საქართველო მზად არის ღიაობისთვის, მზად არის შეასრულოს სატრანსპორტო დერეფნის ფუნქცია, გააუმჯობესოს სატრანსპორტო გარემო, ითანამშრომლოს ეკოლოგიური უსაფრთხოების სფეროში, იყოს ენერგეტიკის მწარმოებელიც და გამტარიც, აგრეთვე ხელი შეუწყოს სავაჭრო ურთიერთობების გაღრმავებას წევრ ქვეყნებს შორის", - აღნიშნა საქართველოს პრემიერ-მინისტრმა. "ipn"