მესტიის მუნიციპალიტეტის გამგებლის მოადგილე ალექსანდრე ხერგიანი პატიმრობიდან გაათავისუფლეს. ამის შესახებ გავრცელებული ინფორმაცია რადიო „ათინათს“ მესტიის მუნიციპალიტეტის გამგეობაში დაუდასტურეს. „ჯერ არ ვიცი დაბრუნდება თუ არა ის სამსახურში. სასამართლო განჩინებასაც უნდა გადავხედოთ, ეს მარტივი პროცესი არ არის“, - განუცხადა რადიო „ათინათს“ მესტიის მუნიციპალიტეტის გამგებელმა კაპიტონ ჟორჯოლიანმა. ცნობისთვის, ალექსანდრე ხერგიანი საქართველოს ფინანსთა სამინისტროს საგამოძიებო სამსახურის თანამშრომლებმა განსაკუთრებით დიდი ოდენობით ქრთამის აღების ფაქტზე გასული წლის 12 სექტემბერს დააკავეს. "გამოძიებით დადგინდა, რომ დაკავებულმა, სამსახურებრივი მოვალეობის შესრულებისას, მესტიის რაიონში, სახელმწიფო დაფინანსებით 23 მილიონი ლარის ღირებულების საამშენებლო-სარეაბილიტაციო სამუშაოების მიმდინარეობისას, არსებული ხარვეზების მიუხედავად, სამუშაოების საბოლოო მიღება-ჩაბარების დოკუმენტებში ჩატარებული სამუშაოს შესრულებულად დაფიქსირების სანაცვლოდ, ერთ-ერთი მეწარმისგან, ქრთამის სახით, 300 000 ლარი აიღო“, - იუწყებოდა მაშინ საქართველოს ფინანსთა სამინისტროს საგამოძიებო სამსახური. მათივე ცნობით, გამოძიება საქართველოს სისხლის სამართლის კოდექსის 338-ე მუხლის მესამე ნაწილით მიმდინარეობდა. ბრალის დამტკიცების შემთხვევაში ხერგიანს თერთმეტიდან თხუთმეტ წლამდე ვადით თავისუფლების აღკვეთა ემუქრებოდა.