7 თებერვალს სოჭში დაგეგმილ ზამთრის 22-ე ოლიმპიური თამაშების გახსნის ცერემონიალზე ქართველი მოციგურავე ეროვნული დროშით წარდგება. სათადარიგო მედროშედ კი იასონ აბრამაშვილი განიხილება. ამ დროისთვის საქართველოს ოლიმპიური ნაკრები ოთხი წევრისგან შედგება. ელენე გედევანიშვილის გარდა, გუნდში კიდევ სამი მოთხილამურე ირიცხება. თვის ბოლომდე ჩვენი ნაკრების შემადგენლობა შესაძლოა, კიდევ ერთი მოთხილამურით გაიზარდოს. ელენე გედევანიშვილი ამჟამად ბუდაპეშტში იმყოფება, სადაც მოციგურავეთა ევროპის ჩემპიონატი ტარდება. “ჩემთვის დიდი პატივია, რომ მე დროშის წამღებად ამირჩიეს. ორი აზრი არ არის, რომ მე ამას დავეთანხმები. წინა ორ ოლიმპიადაზე ისე მოხდა, რომ გახსნაზე ვერ ჩავედი. რადგან ჩვენი შეჯიბრება ცოტა გვინაა, ვარჯიშების საშუალება არ არის, დღეში მხოლოდ ნახევარ საათს გვაძლევენ და ეს საკმარისი არ არის, რომ ჩემი ფორმა შევინარჩუნო. დროშის წაღების გარდა კიდევ უფრო მნიშვნელოვანია, რომ ჩემი ქვეყანა და დროშა ღირსეულად წარმოავდგინო”, - განაცხადა გედევანიშვილმა. სოჭში ქართული დელეგაცია 6 თებერვალს გაემგზავრება. ოლიმპიური თამაშები კი 7 თებერვლიდან 23 თებერვლის ჩათვლით გაიმართება.