"საერთაშორისო გამჭვირვალობა – საქართველო" მერებისა და გამგებლების არჩევისთვის 50 %-იანი ბარიერის დაწესების მომხრეა. როგორც "საერთაშორისო გამჭვირვალობა – საქართველოს" აღმასრულებელმა დირექტორმა ეკა გიგაურმა ჟურნალისტებს განუცხადა, დემოკრატიის უფრო მაღალი სტანდარტის გამოვლინება იქნება ის, რომ აღნიშნული თანამდებობის პირები მოსახლეობის უმრავლესობის მიერ იქნენ არჩეულნი. "ის ინიციატივა, რომელიც გაჟღერდა საქართველოს პრემიერ-მინისტრის მიერ და რომელზეც საუბრობს უმრავლესობა, ვფიქრობთ, გაუმჯობესებული ვარიანტია და მნიშვნელოვანია, რომ ბარიერი გაზრდილი იქნას, თუმცა ჩვენთვის გაუგებარია, რატომ არის საუბარი 40 %-ზე. სხვადასხვა საკანონმდებლო აქტში აღნიშნულ ცვლილებებში საუბარია 50 %-იან ზღვარზე - ეს არის ის, რომელიც პარლამენტმა პირველი მოსმენით მიიღო. შესაბამისად, ჩვენთვის გაუგებარია, რატომ მოხდა მმართველი კოალიციის პოზიციის შეცვლა ამ კონკრეტულ საკითხთან დაკავშირებით. ჩვენი ორგანიზაციის პოზიციაა, რომ მერებისა და გამგებლისთვის ზღვარი აიწიოს 50 %-მდე. ვფიქრობ, ეს იქნება უფრო სწორი და ამ შემთხვევაში ვისაუბრებთ დემოკრატიის უფრო მაღალ სტანდარტზე. 50 %-იანი ბარიერის გადალახვის შემთხვევაში, არჩეული პირის ლეგიტიმაცია იქნება უფრო მაღალი, იქედან გამომდინარე, რომ მას მოსახლეობის უმეტესობამ დაუჭირა მხარი. რა თქმა უნდა, ამ შემთხვევაში მეორე ტურის ალბათობა არსებობს და როგორც ამბობენ, საქართველოსნაირ ქვეყანაში ეს არ არის მიზანშეწონილი, რადგან კონკრეტულ ხარჯებთანაა დაკავშირებული, თუმცა, მეორე მხრივ, თუკი დემოკრატიის უფრო მაღალ ხარისხზე ვსაუბრობთ, მოსახლოების უმეტესობის პოზიცია და დამოკიდებულება უნდა იქნას გათვალისწინებული, როცა საქმე შეეხება გამგებელს და პირდაპირ არჩეულ მერს", - აღნიშნა გიგაურმა. ამასთან, "საერთაშორისო გამჭვირვალობა – საქართველოს" აღმასრულებელი დირექტორი აღნიშნული საკითხის დასმას ინტერფრაქციული ჯგუფის ფარგლებში გეგმავს. "გარდა ზღვარისა, ასევე არის მნიშვნელოვანი საკითხები, რაც უკავშირდება თვითმმართველობის რეფორმას, თვითმმართველობის არჩევნებს და ზოგადად საარჩევნო რეფორმას. ძალიან მნიშვნელოვანია, რომ უახლოეს პერიოდში მიღებულ იქნას პოლიტიკური გადაწყვეტილება საარჩევნო სისტემის ცვლასთან დაკავშირებით. სამწუხაროდ, გვაქვს არც თუ სახარბიელო მოცემულობა _ არჩევნებამდე რამდენიმე თვეა დარჩენილი და საარჩევნო სისტემასთან დაკავშირებით არანაირი პოზიცია არ გააჩნია მმართველ გუნდს. შესაბამისად, არანაირი გადაწყვეტილება არაა მიღებული. დღეის მდგომარეობით, ნამდვილად უსამართლო საარჩევნო სისტემა არსებობს", - დასძინა გიგაურმა.