საქართველოს საგარეო საქმეთა სამინისტრომ გააფრთხილა სოჭის ოლიმპიურ თამაშებში  მონაწილე ქვეყნების ეროვნული დელეგაციების წევრები და მოქალაქეები, რომ სეპარატისტულ აფხაზეთში რუსეთიდან შესვლა კანონის დარღვევაა და საქართველოში სისხლის სამართლის კოდექსით ისჯება. ამ განცხადებას წინ უძღოდა სეპარატისტული აფხაზეთის ხელისუფლების მიერ სოჭის ოლიმპიური თამაშების დროს სავიზო რეჟიმის გამარტივება იმ უცხოელებისთვის, რომელთაც რეგიონში შესვლა რუსეთიდან სურთ, ფსოუს სასაზღვრო გამშვები პუნქტის გავლით, რომელიც სოჭიდან დაახლოებით 40 კილომეტრში მდებაორებს. „აღნიშნული გადაწყვეტილება წარმოადგენს კიდევ ერთ პროვოკაციულ ქმედებას საქართველოს სუვერენიტეტისა და ტერიტორიული მთლიანობის წინააღმდეგ და მიზნად ისახავს უცხო ქვეყნების მოქალაქეების შეცდომაში შეყვანას“, – განაცხადა საქართველოს საგარეო საქმეთა სამინისტრომ. საგარეო უწყების ინფორმაციით, საქართველოს კანონმდებლობით, აფხაზეთის და სამხრეთ ოსეთის „ოკუპირებულ ტერიტორიებზე“ შესვლა იმ ტერიტორიებიდან, რომლებიც საქართველოს მიერ არ კონტროლდება, სისხლის სამართლის დანაშაულია და ამ წესის დარღვევა ისჯება ფულადი ჯარიმით, ან ორიდან ოთხ წლამდე პატიმრობით. განცხადებაში საგარეო საქმეთა სამინისტრომ ასევე მოუწოდა უცხოეთის ქვეყნებს გააფრთხილონ თავიანთი მოქალაქეები საქართველოს ოკუპირებულ ტერიტორიებზე უკანონო შესვლის თაობაზე. საქართველოს საგარეო საქმეთა სამინისტროს ჯერ არ მოუხდენია რეაგირება სეპარატისტული აფხაზეთის და სამხრეთ ოსეთის ლიდერების მიერ 7 თებერვალს ოლიმპიადის გახსნის ცერემონიაზე დასწრებასთან დაკავშირებით. აფხაზეთის და სამხრეთ ოსეთის ლიდერები, ალექსანდრე ანქვაბი და ლეონიდ თიბილოვი გვერდიგვერდ ისხდნენ ფიშტის სტადიონზე იქვე ახლოს, სადაც აზერბაიჯანის პრეზიდენტი ილჰამ ალიევი და სხვა უცხოელი მაღალი რანგის წარმომადგენლები ისხდნენ ოლიმპიადის გახსნის ცერემონიაზე.