მმართველი კოალიცია მზად არის,  პოლიტიკურ ოპონენტებს 50%-იანი საარჩევნო ბარიერის პირობებში შეეჯიბროს. ასეთი მზაობის შესახებ ჟურნალისტებთან გუშინ პარლამენტის თავმჯდომარემ დავით უსუფაშვილმა ისაუბრა. "ირაკლი ღარიბაშვილს საარჩევნო ბარიერის თემაზე კოალიციასთან საუბარი ჰქონდა. მიუხედავად იმისა, რომ ჩვენ შეჯერებული ვიყავით, გამგებლებთან მიმართებაში 33%-იან საარჩევნო ბარიერზე, ხოლო მერებთან დაკავშირებით 40%-იან ბარიერზე, მან გვთხოვა, რომ ბარიერის გაზრდის საკითხზე გვეფიქრა. მიღებულია გადაწყვეტილება, რომლის თანახმად, ყველა რაიონსა და ქალაქში იქნება 50%-იანი ბარიერი", - განაცხადა ჟურნალისტებთან საუბრისას პარლამენტის თავმჯდომარემ. დავით უსუფაშვილს უჭირს იმის პროგნოზირება, გამოიწვევს თუ არა 50%-იანი ბარიერის ამოქმედება საარჩევნო ოლქებში მეორე ტურების ჩატარების აუცილებლობას. მისი თქმით, ეს დამოკიდებული იქნება კანდიდატების სიძლიერეზე და არჩევნებამდე 4 თვით ადრე მეორე ტურების პროგნოზირება რთულია.