ზუგდიდის ღვთისმშობლის შობის სახ.ტაძარში მომხდარ სასწაულს საკუთარი ფეისბუქის გვერდზე ტაძრის წინამძღვარი მამა ილარიონი გამოეხმაურა: „გუშინ ჩვენს ტაძარში წირვის შემდეგ ერთ-ერთმა ქალბატონმა შეიძინა მაცხოვრის ხატი, სახლში მისვლის შემდეგ ოჯახის წევრებმა შეამჩნიეს, რომ ხატზე მაცხოვრის თვალებიდან წითელი სითხე წამოვიდა, რამაც ისინი ძალიან შეაშინა, რადგან რამდენიმე თვის წინ მსგავსი მოვლენა მათ სახლში ერთხელ უკვე მოხდა- წმ.გიორგის ხატიდან წამოვიდა წითელი სითხე - გარკვეული დროის შემდეგ მათ სახლი დაეწვათ და ეს ორი მოვლენა (წმ.გიორგის ხატიდან წითელი სითხის დენა და სახლის დაწვა) ერთმანეთს დაუკავშირეს. არ შემიძლია ამ მოვლენების ერთმანეთთან კავშირი არც უარვყო და არც დავადასტურო, მაგრამ წმ.წერილიდან ვიცით, რომ სინანულით, ლოცვით, მარხვითა და მოწყალებით დიდი უბედურებაც შეგვიძლია თავიდან ავიცილოთ. ამის მაგალითია ისაია წინასწარმეტყველი და ებრაელების მეფე ეზეკია (მეოთხე მეფეთა 20.1-7), იონა წინასწარმეტყველი და ნინეველები(იონა 3.1-10). „დიდ ხარ შენ უფალო, და საკვირველ არიან საქმენი შენნი, და ვერვინ შემძლებელ არს მადლის მიცემად საკვირველებათა შენთა“. როდესაც ადამიანი ჭეშმარიტებას ეძებს, ღმერთი მას ამ გზაზე ზოგჯერ ნიშნებს და სასწაულებს მოუვლენს, რათა რწმენაში განმტკიცდეს და ცხოვრება უკეთესობისკენ შეცვალოს, რადგან წერია „ეძებეთ უპირველესად უფლის სასუფეველი და სიმართლე მისი, და ყოველივე ეს მოგეცემათ თქვენ“(მთ.6.33). თუ ადამიანი სარწმუნოებაში მხოლოდ სასწაულს ეძებს, მას ეს არ მიეცემა ,რადგან უფალი ამბობს „უკეთური და მემრუშე მოდგმა სასწაულს ეძებს; მაგრამ სასწაული არ მიეცემა მას, გარდა იონა წინასწარმეტყველის სასწაულისა“(მთ.12.39), ხოლო თუ რამე არაბუნებრივი და განსაკუთრებული იხილა, ამით მხოლოდ ცნობისმოყვარეობას დაიკმაყოფილებს და მალევე დაავიწყდება, ისე რომ სულს სასიკეთოს ვერაფერს შესძენს.“ წერს წინამძღვარი მამა ილარიონი.