შემოსავლების სამსახური „TV MR საქართველოსგან“ ტელერეიტინგებში მონაწილე პირთა შესახებ ინფორმაციის მიწოდებას სასამართლოს გზით ითხოვს. შემოსავლების სამსახური სასამართლოს სთხოვს კომპანია დაავალდებულოს კვლევაში მონაწილე პირთა შესახებ ინფორმაცია მიაწოდოს. შემოსავლების სამსახურის მიმართვას თბილისის საქალაქო სასამართლო 25 მარტს განიხილავს. სასამართლოს მიერ მიღებული დადგენილებით გადაწყდება, დაევალება, თუ - არა,  „TV MR საქართველოს“ კვლევაში მონაწილე პირთა შესახებ ინფრომაციის შემოსავლების სამსახურისთვის მიწოდება. შემოსავლების სამსახური „TV MR საქართველოს“ მიმდინარე წლის 24 თებერვლიდან ამოწმებს. შემოსავლების სამსახურის აუდიტის დეპარტამენტმა ინვეტარიზაციის დასრულების შემდეგ ორგანიზაციას „ფიფლმეტრების“ განთავსების ადგილის შესახებ ინფორმაციის მიწოდება სთხოვა. კომპანია ინფორმაციის მიწოდებაზე უარს ამბობს, რადგან მიაჩნია, რომ კვლევაში მონაწილე პირების ინფორმაციის გაცემით კვლევის სანდოობაა საეჭვო გახდება. სწორედ ამ მიზეზით „TV MR საქართველო“ კვლევაში მონაწილე ოჯახების კონფიდენციალური ინფორმაციის დაცვის მიზნით შემოსავლების სამსახურს  „ფიფლმეტრების“ ოჯახებიდან გადმოტანასა და აღწერას სთავაზობდა, რაზეც შემოსავლების სამსახურმა უარი განაცხადა. იმის გამო, რომ კომპანიამ კვლევაში მონაწილე პირთა მონაცემები არ გაამხილა, ის დაჯარიმდა. „TV MR საქართველომ“ „ფიფლმეტრების“ საშუალებით ტელეკომპანიების რეიტინგების კვლევა 20 მარტს შეწყვიტა. როგორც კომპანიის წარმოამდგენლებმა განმარტეს, კვლევის შეჩერების მიზეზი კომპანიის კუთვნილი მოდემების ფუნქციონირების დარღვევა გახდა. „TV MR საქართველო“ „ნილსენის“ სატელევიზიო აუდიტორიის გაზომვების ლიცენზირებული წარმომადგენელია საქართველოში და 350-ზე მეტი „ფიფლმეტრის“ საშუალებით ტელევიზიების რეიტინგებს ზომავს. კომპანიის კლიენტები - საქართველოში მოქმედი 11 ტელევიზია და 18 სარეკლამო სააგენტოა. ეს კომპანიები უკვე 5 დღეა სატელევიზიო რეიტინგებს ვერ იღებენ.