1991-1992 წლების ქართულ-ოსური, 1992-93 წლების ქართულ-აფხაზური და 2008 წლის შეირაღებული კონფლიქტების შედეგად საქართველოში 2000- ზე მეტი ადამიანი უგზო-უკვლოდ დაკარგულად ითვლება. ახალგაზრდა ფსიქოლოგთა და ექიმთა ასოცია “ქსენონი“, წითელი ჯვრის საერთაშორისო კომიტეტის დელეგაცია და ფონდი „მოლოდინი“ყოველი წლის 30 აგვისტოს უგზო-უკვლოდ დაკარგულთა საერთაშორისო დღეს აღნიშნავენ . ამ ორგანიზაციების მხარდაჭერით  საქართველოში საომარი მოქმედებების დროს უგზო-უკვლოდ დაკარგულ პირთა მოძიება და მათი ოჯახის წევრების ფსიქო-რეაბილიტაცია მიმდინარეობს. „წითელი ჯვრის“ საერთაშორისო კომიტეტის საქართველოს წარმომადგენლობის მონაცემებით, აფხაზეთის კონფლიქტის შედეგად, ორივე მხარის 2000 -მდე პირი უგზო-უკვლოდ დაკარგულად ითვლება. დაკარგულთა რაოდენობა  2008 წლის აგვისტოს ომმა გაზარდა. „წითელი ჯვრის“ შუამდგომლობით,  კონფლიქტის მონაწილე ორივე  მხარეს ჩამოყალიბებული იყო კომისიები, რომლებიც უგზო-უკვლოდ დაკარგულთა მოძიებას ცდილობდნენ, თუმცა 2003 წლის შემდეგ იყო გარკვეული პაუზა. უკვე 2011 წლიდან, ისევ „წითელი ჯვრის“ ეგიდით, ჰუმანიტარული მექანიზმი შეიქმნა, რომლის მიზანია კონფლიქტში მონაწილე მხარეების ხელისუფლებებს შორის დიალოგის ხელშეწყობა. „წითელი ჯვრის“ საერთაშორისო კომიტეტის ფინანსური დახმარებით, ზუგდიდში მუშაობს ახალგაზრდა ფსიქოლოგთა და ექიმთა ასოციაცია ”ქსენონი”, რომელიც ომში დაღუპულთა და დაკარგულთა ოჯახის წევრებს ფსიქოლოგიურ დახმარებას უწევს. ორგანიზაციის დირექტორი ნინო ჯანაშია ამბობს, რომ ამ ადამიანებს ყველაზე მეტად უყურადღებობა აწუხებთ: ”პირველ რიგში, მათ აქვთ ადამიანური ურთიერთობებისა და სითბოს დეფიციტი“ - აცხადებს ჯანაშია. ფონდ „მოლოდინის“ თავმჯდომარის ვლადიმერ დობორჯგინიძის თქმით, გაუჩინარებული ადამიანების მოძიება დღემდე გრძელდება.