შემოსავლების სამსახურში ვარაუდობენ, რომ დაუბეგრავი მინიმუმის უფლებით მოსარგებლეთა რიცხვმა შესაძლოა, 500 000-ის ნაცვალდ დაახლოებით 600 000 შეადგინოს. უწყების საზოგადოებასთან ურთიერთობის სამსახურის უფროსის ხატია მოისწრაფიშვილის განცხადებით დაუბეგრავი მინიმუმის დაბრუნების პროცესისადმი არსებული მაღალი ინტერესიდან გამომდინარე შემოსავლების სამსახურის ვებ-გვერდზე rs.ge შეიქმნა ახალი აპლიკაცია სახელწოდებით "დაუბეგრავი მინიმუმის რეგისტრირებული დეკლარაციების რაოდენობა". მოისწრაფიშვილის განმარტებით, აპლიკაციის მეშვეობით ნებისმიერ დაინტერესებულ პირს საშუალება აქვთ რეალურ დროში ადევნოს თვალყური დეკლარირების პროცესს და მიიღოს უახლოესი ინფორმაცია დეკლარირებული განაცხადების რაოდენობის, ასევე დაუბეგრავი მინიმუმის ფარგლებში თანხის ოდენობის შესახებ. განაცხადების რაოდენობა ყოველ 5 წამში იცვლება, ინფორმაცია დაბრუნებული თანხის შესახებ კი ყოველ ნახევარ საათში ახლდება. "აპლიკაციით სარგებლობა მარტივია. კერძოდ, აპლიკაციის პირველი ციფრი აღნიშნავს მიმდინარე დღის მონაცემებს. მეორე ციფრი - პირველი აპრილიდან ვიზიტის მომენტისათვის შევსებული დეკლარაციების რაოდენობაა, მესამე – საერთო რაოდენობიდან საბანკო დაწესებულებებში შევსებული განაცხადების რაოდენობა, ხოლო მეოთხე – მიმდინარე მომენტისთვის დაბრუნებული თანხის რაოდენობა. დეკლარირების პროცესის პარალალურად მიმდინარეობს დამქირავებლების მიერ განაცემების შესახებ ინფორმაციის შემოსავლების სამსახურისთვის მოწოდების პროცესი. დაზუსტებების შესაბამისად შესაძლოა შეიცვალოს ინფორმაცია, როგორც დაქირავებულისთვის ხელფასის მოცულობის, ისე ხელფასის მიმღებ პირთა ოდენობის შესახებაც. აქედან გამომდინარე შემოსავლების სამსახურის პროგნოზით, დაუბეგრავი მინიმუმის უფლებით მოსარგებლეთა რიცხვი შესაძლოა გაიზარდოს და 500 000 ნაცვალად დაახლოებით 600 000 შეადგინოს", - განაცხადა ხატია მოისწრაფიშვილმა. პირველი აპრილიდან დღემდე შევსებული დეკარაციების რაოდენობა 394 662-ს შეადგენს, ხოლო დაბრუნებული თანხა 35 728 368 ლარია.