ცენტრალურმა საარჩევნო კომისიამ მიიღო პრეზიდენტის განკარგულება, რომლის კონტრასიგნაციაც საქართველოს მთავრობამ მოახდინა. 15 ივნისის არჩევნების შედეგად აირჩევა 71 საკრებულო - საერთო რაოდენობით 2,088 საკრებულოს წევრი, 12 ქალაქის მერი და 59 მუნიციპალიტეტის გამგებელი.

საარჩევნო ადმინისტრაციამ უკვე დაიწყო კანონმდებლობით გაწერილი საარჩევნო პროცედურების განხორციელება და  გამართულ სხდომაზე საარჩევნო ღონისძიებათა გრაფიკიც დაამტკიცა. დოკუმენტში დეტალურად არის გაწერილი კომისიის მიერ განსახორციელებელი თითოეული აქტივობა.

როგორც სხდომის დასრულების შემდეგ, ცესკოს თავმჯდომარე თამარ ჟვანიამ ჟურნალისტებთან საუბრისას აღნიშნა - საარჩევნო ადმინისტრაცია სრულ მზადყოფნაშია არჩევნების ორგანიზებისთვის, - "მთელი შემადგენლობით გადავდივართ მუშაობის საგანგებო რეჟიმზე, იმისათვის, რომ უზრუნველვყოთ არჩევნები ყველანაირი ხარვეზის გარეშე და თითოეულ ამომრჩეველს მივცეთ შესაძლებლობა შეასრულოს საკუთარი მოქალაქეობრივი ვალი.

აქვე, მინდა ვისარგებლო შემთხვევით და არჩევნებში ჩართულ ყველა დაინტერესებულ მხარეს, საერთაშორისო და ადგილობრივ სადამკვირვებლო ორგანიზაციებს, მედიას მოვუწოდო - კვლავაც აქტიურად ჩაერთონ საარჩევნო პროცესებში და კანონით დადგენილ ვადებში დროულად დაიწყონ რეგისტრაციის პროცესი.

მივმართავ თითოეულ ამომრჩეველს, იყავით აქტიურები, ცესკო კი  მუდმივად უზრუნველყოფს თქვენს ინფორმირებულობას და დროულად მოგაწვდით არჩევნებისთვის მზადების პროცესის შესახებ ყველა სახის ინფორმაციას”, - განაცხადა თამარ ჟვანიამ.