კვირას, 20 აპრილს ქრისტიანული სამყარო იესო ქრისტეს ბრწყინვალე აღდგომის დღესასწაულს აღნიშნავს. ესაა ზეიმთა ზეიმი, აღმნიშვნელი მესიის მოვლინებისა, რაზედაც მოსეს ხალხი ეგვიპტის მონობიდან თავის დაღწევის შემდეგ ოცნებობდა, რასაც ბიბლიური წინასწარმეტყველნი ქადაგებდნენ და რაც სინედრიონის ნებით ჯვარცმული ქრისტეს სახით განხორციელდა. მორწმუნეები დღესასწაულს ეკლესიაში ხვდებიან და ლიტურგიაზე ასრულებენ საგალობელს ,,რაოდენთა ქრისტეს მიერ“. თბილისში, სამების საპატრიარქო ტაძარში ლოცვა შაბათს, 22.00 საათზე დაიწყება, რომლის შემდეგაც 23.00 საათზე პატრიარქის სააღდგომო ეპისტოლეს წაიკითხავენ, შემდეგ კი დაიწყება ლიტანიობა. აღდგომის ღამეს ჩამოაბრძანებენ ღვთიურ ცეცხლს იერუსალიმიდან, რომელსაც სამების ტაძრიდან მრევლი და სასულიერო პირები ქვეყნის ყველა რეგიონში წაიღებენ. აღდგომის ბრწყინვალე დღესასწაულს გვილოცავს ზუგდიდის ვლაქერნის ღვთისმშობლის ეკლესიის წინამძღვარი მამა მალხაზ ჭანტურია. აღდგომის დღესასწაულის შემდეგ მთელი კვირის განმავლობაში მორწმუნეები მისალმებისას ,,გამარჯობის“ ნაცვლად ერთმანეთს ეუბნებიან: ,,ქრისტე აღსდგა“, რაც იმას ნიშნავს, რომ ისინი აღდგომის დღესასწაულს მთელი კვირა ზეიმობენ.