საქართველოს ცენტრალური საარჩევნო კომისიის თავმჯდომარე თამარ ჟვანია საოლქო საარჩევნო კომისიებს ღია წერილით მიმართავს. იგი საოლქო კომისიებს საუბნო საარჩევნო კომისიების წევრების არჩევისას პასუხისმგებლობის გამოჩენისაკენ მოუწოდებს. „ყველას კარგად მოგეხსენებათ, რომ ყოველი წარმატებულად და პროფესიულ დონეზე ორგანიზებული არჩევნები ხელს უწყობს ქვეყანაში დემოკრატიული პროცესების განვითარებას, არჩევნებისა და საარჩევნო ადმინისტრაციის მიმართ ნდობის გაღრმავებას. შესაბამისად, ჩვენი ვალდებულებაა პასუხისმგებლობით მოვეკიდოთ ჩვენს საქმეს და ყოველთვის მზად ვიყოთ გამოწვევებისთვის. 26-30 აპრილს თქვენ ირჩევთ საუბნო საარჩევნო კომისიების წევრებს. დარწმუნებული ვარ, ამ საკითხს მაქსიმალური პასუხისმგებლობითა და პროფესიონალიზმით მოეკიდებით და საუბნო საარჩევნო კომისიების წევრებად აირჩევთ მცოდნე, გადაცდომების არმქონე, მიუკერძოებელ პირებს, სამაგალითო პროფესიული გამოცდილებით“, – ნათქვამია თამარ ჟვანიას განცხადებაში. მას სჯერა, რომ ისინი ამ პროცესს კარგად გაართმევენ თავს და საარჩევნო ადმინისტრაციის საქმიანობა მორიგი წარმატებული და სანდო არჩევნების მნიშვნელოვანი გარანტი იქნება.