თბილისის საკრებულოს თავმჯდომარემ, ირაკლი შიხიაშვილმა და საკანონმდებლო ორგანოს უმრავლესობის წევრებმა აშშ-სა და სტრასბურგში მცხოვრებ ქართულ სათვისტომოებს წიგნები, ჩოხები, ჟილეტები, ქუდები და სხვა ტრადიციული აქსესუარები გაუგზავნეს. საკრებულოს პრესსამსახურის ინფორმაციით, როგორც ირაკლი შიხიაშვილმა აღნიშნა, საჩუქრების იდეა საკრებულოს დელეგაციის სტრასბურგსა და აშშ-ში ვიზიტის დროს გაჩნდა. შიხიაშვილის თქმით, საზღვრებს გარეთ ცხოვრობენ ბავშვები, რომლებიც მოწყურებულნი არიან ქართულ ენას და სურვილი აქვთ უკეთესად დაეუფლონ მას. მისივე განცხადებით, აღნიშნულ ქვეყნებში არსებობს ქართული ცეკვის წრეები, თუმცა ბავშვებს არ აქვთ ჩოხები და ტრადიციული აქსესუარები. "ჩვენი მიზანია, იმ თაობამ, რომელიც იზრდება საკუთარი ქვეყნის გარეთ, კარგად და სრულყოფილად შეისწავლოს მშობლიური ენა და უკეთ გაეცნოს ქართველ კლასიკოსებს. აუცილებელია შედგეს კომუნიკაცია ჩვენს ქვეყნებს შორის. ყველაფერს გავაკეთებთ, რომ არ დავკარგოთ არც ერთი ქართველი, რომელიც ჩვენი ქვეყნის გარეთ ცხოვრობს და შეძლებისდაგვარად შევუწყობთ ხელს, რომ მათთვის არ გახდეს უცხო საკუთარი სამშობლო", - განაცხადა ირაკლი შიხიაშვილმა.