განათლებისა და მეცნიერების სამინისტროს ინფორმაციით, სასწავლო სეზონი 2082 საჯარო სკოლაში დაიწყო. ახალი სასწავლო წლისთვის სარეაბილიტაციო სამუშაო წელს 527 საჯარო სკოლაში განხორციელდა. იხსნება სკოლები კახეთში, სამეგრელოსა და გურიაში. 140 ათასი მოსწავლე, პირველიდან მე-12 კლასის ჩათვლით, სახელმწიფოსაგან საჩუქრად სასკოლო სახელმძღვანელოებს მიიღებს. სახელმძღვანელოები გადაეცემათ სოციალურად დაუცველი ოჯახების წევრებს (70001-ზე ნაკლები ქულით); იმ ოჯახების მოსწავლეებს, სადაც ერთდროულად სამი ან მეტი და-ძმა სწავლობს სკოლაში; 2008 წლის აგვისტოს ომში დაღუპული მეომრების შვილებს. სულ ამ სამი კატეგორიის მოსწავლეებზე მილიონამდე წიგნი გაიცემა. ყველა საჯარო სკოლის პირველკლასელს სკოლაში პრეზიდენტის საჩუქარი  ნეტ-ბუკი დახვდება . „ახალი სასწავლო წლისთვის ზუგდიდის მუნიციპალიტეტის ყველა საჯარო სკოლის შენობა განახლებულია და ყველა მათგანში სასწავლო პროცესი შეუფერხებლად დაიწყო“ - უცხადებს რადიო “ათინათს“ ზუგდიდის რესურსცენტრის ხელმძღვანელი ლელა ქებურია. ზუგდიდის მუნიციპალიტეტის 21  საჯარო სკოლიდან 20–ს ნაწილობრივი რეაბილიტაცია ჩაუტარდა, ოდიშის საჯარო სკოლას კი რესურსცენტრის ხელმძღვანელის თქმით, საფუძვლიანი რემონტი დასჭირდა. რაც შეეხება სასკოლო სახელმძღვანელოებს, წელს პირველად, სასკოლო სახელმძღვანელოები საქართველოს მასშტაბით 400 სკოლაში გაიყიდება. სახელმძღვანელოს მაქსიმალური ფასი 10 ლარი იქნება. წიგნების შეძენის შესაძლებლობა მოსწავლეებს 10 სექტემბრიდან 8 ოქტომბრის ჩათვლით მიეცემათ.