ბრიტანეთში მცხოვრები ემიგრანტები საქართველოში პატიმრების წამების ფაქტებს აპროტესტებენ. ამის შესახებ ემიგრანტების მიერ გავრცელებულ განცხადებაშია აღნიშნული. "გუშინ და დღეს ყველამ ვიხილეთ ის გაუგონარი და წარმოუდგენელი ძალადობა, რასაც საქართველოს ხელისუფლება, უმაღლესი ეშელონების დაკვეთით საპატიმროებში ახორციელებს. შეუძლებელია ამის მშვიდად ყურება. ისინი სიტყვით დემოკრატიას და ადამიანის უფლებების პრიმატს ღაღადებენ და საქმით კი ჩვენს ძმებს, მამებს და შვილებს არაადამინური წამების ქვეშ ამყოფებენ. დღეს, როგორც არასოდეს, დიდ ბრიტანეთში მყოფი ემიგრანტები ერთ მუშტად ვართ შეკრული. პრაქტიკულად ყველა რეგიონიდან მოიწევს ხალხი ლონდონში, რომ ერთად დავგმოთ ეს აუტანელი სადიზმი. ემიგრაციის დიდი ნაწილი სულ ახლახანს შევიკრიბეთ ლონდონში პარლამენტის წინ და ჩვენი მხარდაჭერა და ნდობა გამოვუცხადეთ ძალას, რომელსაც შეუძლია ყველა სფეროში რეალური სასიკეთო ცვლილებების განხორციელება, რომელიც არ დაუშვებს მსგავსი სახის ძალადობას და ადამიანის ასეთ გაუგონარ დონეზე დამცირებას", - აღნიშნულია განცხადებაში და იქვე ნათქვამია, რომ ემიგრატნები დღეს 12:00 საათზე ჩვენ კვლავ ლონდონში, ამჯერად საქართველოს საელჩოს წინ შეიკრიბებიან. "ჩვენ ბევრნი ვიქნებით და დღევანდელ ხელისუფლებას ვაჩვენებთ ჩვენს გაბრაზებას.  ვაჩვენებთ იმასაც, რომ ჩვენს ძმებს გაჭირვებაში არასოდეს მივატოვებთ, ჩვენს ღირსებასთან ერთად ყოველთვის დავიცავთ მათ ღირსებას და ყველაფერს, რაც ჩვენს ძალებშია, ყველაფერს გავაკეთებთ, რომ საქართველოში  ერთხელ და სამუდამოდ დამთავრდეს ადამიანების დაჩაგვრის, დამცირების, შეურაცხყოფის დრო" - აღნიშნულია განცხადებაში.