პროკურატურას პრეზიდენტთან მიმოწერის შესახებ ინფორმაციის გასაჯაროებით სახელმწიფო ინტერესის დაზიანება არ მოუხდენია, - ამის შესახებ "ინტერპრესნიუსს" "ახალგაზრდა იურისტთა ასოციაციის" თავმჯდომარემ, კახა კოჟორიძემ განუცხადა. "შინაარსობრივი თვალსაზრისით, რადგან ამ შემთხვევაში სახელმწიფო ინტერესების დაზიანებას არ ჰქონია ადგილი, აქ დანაშაულის შემადგენლობა არ გვაქვს. გამოძიება შესაძლოა სამართალდამცავმა ორგანომ დაიწყოს, განსაზღვროს ეს რამდენად იყო სახელმწიფო ინტერესების დაზიანება და მერე შეწყვიტოს, მაგრამ ეს ფორმალური მხარეა", - აღნიშნა კახა კოჟორიძემ. მისი თქმით, საია-ს თავდაპირველი შეფასებისას, პრეზიდენტის პირველ განცხადებაში ნათლად არ იყო ხაზგასმული, რა ინფორმაციის გასაჯაროებაზე იყო საუბარი. "პროკურატურას რომ თვითონ ჰქონდა მინიჭებული თავისივე წერილისთვის გრიფი, ეს არავის ჰქონდა ნათქვამი და ჩვენც გავაკეთეთ ის კომენტარი, რაც გავაკეთეთ. ეს ალბათ განპირობებულია არაკოორდინირებულობით და კომუნიკაციის ნაკლებობით, რაც სამწუხაროა და მეტი კომუნიკაცია მოეთხოვებათ, რადგან გარე თვალისთვის და განსაკუთრებულად დიპლომატიური კორპუსისთვის, რომლებიც ამ პროცესს თვალს ადევნებენ, უხერხული დასანახი იქნება ამ საკითხზე ასეთი განცხადებები", - განაცხადა კოჟორიძემ.