აფხაზეთში შეიარაღებული დაპირისპირების დაწყებიდან 22 წლისთავთან დაკავშირებით, აფხაზეთის უმაღლესი საბჭოსა და მთავრობის წევრებმა საქართველოს ტერიტორიული მთლიანობისთვის დაღუპულ გმირთა მემორიალი გვირგვინით შეამკეს. როგორც ჟურნალისტებს აფხაზეთის მთავრობის თავმჯდომარის მოვალეობის შემსრულებელმა ვახტანგ ყოლბაიამ განუცხადა, დღევანდელი დღე საქართველოს ისტორიაში მარადჟამს იქნება. "დღევანდელი დღე არის დღე რომელიც საქართველოს ისტორიაში დარჩება მარადჟამს. ეს დღე დარჩება არა მარტო იმიტომ, რომ ის აფხაზეთში ომის დაწყების თარიღია, არამედ იმიტომ რომ ჩვენ მსგავსი რამ არ უნდა დავუშვათ. დღევანდელი დღე უნდა იყოს ათვლის წერტილი იმ მშვიდობის გზაზე, რა გზაზეც დადის საქართველო. ომი არავის არ უნდა და ჩვენ უნდა ვიაროთ მშვიდობის გზით. დარწმუნებული ვარ, რომ საქართველო ამ გზით გამარჯვებას მიაღწევს ყოველგვარი სისხლისღვრის გარეშე", - განაცხადა ყოლბაიამ. გმირთა მემორიალთან ომში დაღუპული გმირების დედები და აფხაზეთიდან დევნილებიც იმყოფებიან. როგორც "ინტერპრესნიუსს" დევნილმა მაყვალა ფხაკაძემ განუცხადა, ერთადერთი სურვილი რაც აქვს, ეს საქართველოს გაერთიანებაა. "14 აგვისტო ძალიან მძიმე დღეა. 14 აგვისტოს უნდა მომხდარიყო მრავალათასიანი მიტინგი ლეგიტიმიური მთავრობის მხარდასაჭერად, მაგრამ აფხაზეთის გგვარდიამ სნაიპერების მეშვეობით ცეცხლი გაუხსნა ხალხს, წამოვიდნენ ტანკები. საშინელება მოხდა. მე მინდა ჩემ აფხაზეთში დავბრუნდეთ. ჩვენ, აფხაზები და ქართველები რუსების დავალებით დავუპირისპირდით ერთმანეთს. ჩვენ უნდა გავერთიანდეთ", - განაცხადა მაყვალა ფხაკაძემ.