ტელეკომპანიები "მაესტრო", "კავკასია" და "მეცხრე არხი" საკაბელო ტელევიზიებს მოუწოდებენ, რომ მათი არხები ჩართული დატოვონ უსასყიდლოდ "მასთ ქერის" პრინციპის ამოწურვის შემდეგაც. როგორც "ინტერპრესნიუსის" პრესკლუბში გამართულ ბრიფინგზე კოალიცია "მედიის ადვოკატირებისთვის" წევრმა და გაზეთ "რეზონანსის" მთავარმა რედაქტორმა, ლაშა ტუღუშმა განაცხადა, საარჩევნო წელი საქართველოში არ სრულდება მხოლოდ საპარლამენტო არჩევნებით და მომდევნო წელს დაგეგმილია საპრეზიდენტო არჩევნებიც."სწორედ ამიტომ, მოქალაქეთა ინტერესების გათვალისწინებით და პოტენციურ ამომრჩეველთა ინფორმირებისთვის, საჭიროა მათ ხელი მიუწვდებოდეთ ალტერნატიულ ინფორმაციაზე. ამიტომ, მოგმართავთ თხოვნით, "მასთ ქერის" ვადის ამოწურვის შემდეგ, ჩამოთვლილი არხები ერთი წლის განმავლობაში დარჩეს თქვენს საკაბელო პაკეტში და არ დაწესდეს მათზე შეზღუდვა. თქვენს მიმართ რაიმე სახის ზეწოლის შემთხვევაში, გთხოვთ, მოგვაწოდოთ ინფორმაცია, რათა ჩვენ მოვახდინოთ რეაგირება და საქმის კურსში ჩავაყენოთ საერთაშორისო ორგანიზაციები. გარდა ამისა, თუ მოცემულ მომენტში, თქვენს მიმართ ხორციელდება რაიმე სახის ზეწოლა, დაუყოვნებლივ მოგვაწოდოთ ინფორმაცია კონკრეტული ფაქტების შესახებ", - განაცხადა ლაშა ტუღუშმა.

"მაესტროს" გენერალურმა დირექტორმა, ბაჩო კიკაბიძემ განაცხადა, რომ რეგიონის საკაბელოებზე ხორციელდება ზეწოლა და არის მოთხოვნები ადგილობრივი ხელმძღვანელობის მხრიდან, ხარვეზებით გაუშვან აღნიშნული არხები. მისივე თქმით, მნიშვნელოვანია "მასთ ქერის" გაგრძელება, რადგან საზოგადოებისთვის ძალიან მნიშვნელოვანია, რომ მიეწოდოს ინფორმაცია თუ როგორ გაშუქდა არჩევნები. "მე ვთხოვ არასამთავრობო და საერთაშორისო ორგანიზაციებს, რომ ამისთვის ბრძოლა გააგრძელონ", - აღნიშნა კიკაბიძემ. "მე-9 არხის" საინფორმაციო სამსახურის უფროსის, თამარ რუხაძის განცხადებით კი, "მასთ ქერის" გაგრძელებისთვის პირველ რიგში თავად მაყურებლის ჩართულობაა აუცილებელი. "პირველ რიგში მაყურებელმა უნდა მოსთხოვოს საკუთარ საკაბელო ოპერატორს, რომ ეს არხები დარჩეს მათ საკაბელო ქსელში არჩევნების შემდედაც. იმედი გვაქვს, რომ საზოგადოების ჩართულობა იქნება ადეკვატური", - აღნიშნა რუხაძემ.