საქართველოს კულტურის სამინისტროში ხელი ისტორიული მნიშვნელობის დოკუმენტს მოეწერა, რომლის თანახმადაც რუსეთის ფედერაციის სახელმწიფო კინოფონდი „გოსფილმოფონდი“ საქართველოს 1916 წლიდან 1990 წლამდე გადაღებულ და ფონდის არქივში დაცულ ქართულ ფილმებს გადმოსცემს. მემორანდუმს ხელი საქართველოს კულტურის მინისტრმა მიხეილ გიორგაძემ და რუსეთის ფედერაციის სახელმწიფო კინოფონდის გენერალურმა დირექტორმა ნიკოლოზ ბოროდაჩევმა მოაწერეს. „გოსფილმოფონდი“ წარმოადგენს მსოფლიოს უდიდეს არქივს, რომელშიც დაცულია ყოფილი საბჭოთა კავშირის შემადგენლობაში მყოფი, თითქმის ყველა ქვეყნის, მათ შორის საქართველოს კინოშედევრებიც. ინიციატივა ფილმების ქართული მხარისთვის გადმოცემასთან დაკავშირებით, საბჭოთა კავშირის დაშლისთანავე, 90-იან წლებში გაჩნდა, თუმცა ქართველი კინემატოგრაფისტების დიდი ძალისხმევისა და მრავალწლიანი მცდელობის მიუხედავად, რიგი მიზეზების გამო ამ დრომდე ვერ განხორციელდა. კულტურის მინისტრის განცხადებით, ფილმების სრული სია ქართულ მხარეს უკვე გადმოეცა. „გოსფილმოფონდში“ დაცული ქართული კინოარქივის სრულად საქართველოში დაბრუნებას 5 წელი დასჭირდება. ფილმებს ქართული მხარე პოზიტივის ფორმატით მიიღებს, რაც მათი ნებისმიერ ციფრულ ფორმატზე გადაყვანის შესაძლებლობას და ამ გზით, საქართველოში საერთაშორისო, თანამედროვე სტანდარტის კინოარქივის შექმნის საშუალებას იძლევა.