რამდენიმე წუთის წინ ბაჩო ახალაია, გიორგი კალანდაძე და ზურაბ შამათავა დროებითი მოთავსების იზოლატორიდან საქალაქო სასამართლოს შენობაში მიიყვანეს, სადაც მათი სასამართლო პროცესი გაიმართება. პროცესი 14:00 საათისთვის იყო ჩანიშნული. სასამართლო დარბაზში ფოტო–ვიდეო კამერები არ დაუშვეს და დახურულ პროცესზე მხოლოდ ჟურნალსიტები შევიდნენ. სასამართლოს მთავრი პროკურატურის შუამდგომლობა უკვე წარედგინა და სამივე დაკავებულისთვის მთავარი პროკურორი აღმკვეთი ღონისძიების სახით პატიმრობის შეფარდებას ითხოვს. სასამართლოს შენობასთან კი ახალაიას რამდენიმე მხარდამჭერია შეკრებილი. თეა თუთბერიძე და 20-მდე ახალგაზრდა, რომლებიც გავრცელებული ინფორმაციით ძირითადად ზუგდიდიდან არიან ჩამოსულები, სასამართლოსთან ტრანსფარანტებით მივიდნენ. ტრანსფარანტებზე ქართულ და ინგლისურ ენებზე შემდეგი წარწერებია: "პატრიოტი ხარ, დაგიჭერენ", "ბრალი ედებათ პატრიოტიზმში", "დღეს პატრიოტიზმი დასჯადია". როგორც ჟურნალისტებთან საუბრისას თეა თუთბერიძემ განაცხადა, ბაჩო ახალაია პუტინის, ივანიშვილის და ალასანიას პირადი პატიმარია და ის ადამიანები, რომლებიც ახალაიას აკრიტიკებდნენ, დღეს მას უკავშირდებიან და აცხადებენ, რომ ახალმა ხელისუფლებამ უსუსური ბრალდებებით დააკავა როგორც ახალაია, ასევე სამხედრო მაღალჩინოსნები. სასამართლოს შენობასთან „ნაციონალური მოძრაობის“ წევრებიც არიან შეკრებილები. მათი განცხადებით ბაჩო ახალაია პოლიტიკური ნიშნით არის დაკავებული. აკაკი მინაშვილმა ჟურნალისტებს 29 კაციანი დეპუტატთა სია წარუდგინა, რომლებიც სასამართლოს შუამდგომლობით მიმართავენ და ახალაიას თავდებში უდგებიან.