სამაუწყებლო კომპანია "რუსთავი 2"-ის დამფუძნებელთა გადაწყვეტილებით, არხის ახალ გენერალურ დირექტორად ნიკა გვარამია დაინიშნა. ყოფილი გენერალური დირექტორი - გიორგი გეგეშიძე - არხის 9%-იანი წილის მფლობელად რჩება. იგი  დამფუძნებლების გადაწყვეტილებით, არხის სამეთვალყურეო საბჭოს თავმჯდომარის თანამდებობას იკავებს.ტელეკომპანია "რუსთავი 2"-ის საკონტროლი პაკეტი – 51 % გაყიდულია, იგი იმ იურიდიულმა პირმა შეიძინა, რომელიც გასხვისებამდე ტელეკომპანია "საქართველოს" სიხშირეს ფლობდა. ნიკა გვარამიან “მაესტროს” ეთერში განაცხადა, რომ "ტელეკომპანია "საქართველო" არაფერ კავშირში არაა ჟურნალ "ტაბულასა" და მის დამფუძნებლებთან. ტელეკომპანია "საქართველომ" გაყიდა სიხშირე სხვა იურიდიულ პირზე და დღეის მდგომარეობით მას, პრინციპში, პირობითად ჰქვია ტელეკომპანია. მას აღარ აქვს სიხშირე, ისაა ჩვეულებრივი იურიდული პირი თავისი ქონებით, რომელმაც, თავის მხრივ, შეიძინა ტელეკომპანია "რუსთავი 2"-ის საკონტროლო პაკეტი 51 %", - განაცხადა გვარამიამ. სამეწარმეო რეესტრში წარდგენილი დოკუმენტაციიდან ირკვევა 13 ნოემბერს გამართულ პარტნიორთა კრებაზე გადაწყდა, რომ ტელეკომპანია „საქართველო" 51 პროცენტიანი წილის სანაცვლოდ „რუსთავი 2"-ს მის კუთვნილ უძრავ ქონებას მთლიანად გადასცემს. ქონებაში როგორც ტექნიკური აპარატურა, ისე ავეჯი შედის, მისი საერთო ღირებულება კი 5 მილიონ 700 ათასი ლარია.