რობერტ სტურუამ რუსთაველის თეატრის სამხატვრო ხელმძღვანელისა და მმართველის თანამდებობის შეთავსების სურვილი გამოთქვა. როგორც სტურუამ ჟურნალისტებს განუცხადა, თეატრში "დიქტატორივით დაბრუნდება". ზაალ ჩიქობავას თეატრში დარჩენასთან დაკავშირებით სტურუას ამ ეტაპზე პასუხი არ აქვს. "ზაალი შეიძლება იყოს. ვერ ვიტყვი, რომ არაფერს აკეთებს. მაგრამ, როცა მე ვბრუნდები, მჭირდება, ვიყო დიქტატორი. დავშლი დასს, რადგან მათ უმეტესობას კონტრაქტები უმთავრდება და თავიდან ავკრეფ. ეს იქნება აკრეფა ნიჭით", - განაცხადა სტურუამ. "ფეისბუქში" რამდენიმე დღის წინ დაწერილ სტატუსს კი რეჟისორი არაფხიზელ მდგომარეობაში ყოფნას უკავშირებს. "ეს სტატუსი ოდნავ შეზარხოშებულმა დავწერე. ფხიზელი რომ ვყოფილიყავი, არ დავწერდი", - აღნიშნა სტურუამ. რეჟისორმა რუსთაველის თეატრში დაბრუნების შესახებ სოციალურ ქსელ "ფეისბუქში" საკუთარ გვერდზე 19 ნოემბერს დაწერა. "გადავწყვიტე! მოვდივარ! თეატრი არც უფერული მსახიობის ზალიკოს (ჩიქობავას) კუთვნილებაა, არც - ოლივერის და არც პატარა ტკიპების, მმართველმა როგორც მურმანივით შეასია თეატრს. მოვდივარ! ეს თეატრი ილიას, აკაკის, იაკობის დაარსებულია და კოტეს ვნებები, ახმეტელის სისხლი, დოდოს თეატრალობა, მიშას ერთგულება მაიძულებს, ამ უზურპატორებს გავუსწორდე. ვინ არიან ეს პუკები ან გაზარმაცებული მსახიობები - თამაში რომ აღარ უნდათ, უბრალოდ ეშინიათ. ან იმ რეჟისორების სიამაყე, ლონდონის 40 წლის წინ დადგმულ სპექტაკლს ქართულ თეატრში უნიჭოდ რომ იმეორებენ. ამიტომ მოვდივარ! ამ თეატრში მეც ვმუშაობდი და ჩემი ვალია, არ მივატოვო ჩემი სახლი, სადაც 50 წელი გავატარე. ხოლო იმ ვითომ ინტელექტუალურ რაჟისორებზე მეტი ნამდვილად წამიკითხავს. ერთი წიგნით მეტი მაინც. და იმ ნიჭიერ მსახიობებს, ვისი ხელფასი ბევრად დაბალია, ვიდრე - უნიჭო არტისტების, ნამდვილად ვუშველი. ბოლოს და ბოლოს, ეს რუსთაველის თეატრია! ქართველების ერთადერთი თეატრი, სამწუხაროდ... მოვდივარ!"-დაწერა სტურუამ. რობერტ სტურუა თეატრის სამხატვრო ხელმძღვანელობიდან, ქსენოფობიური განცხადებების მოტივით, კულტურის მაშინდელი მინისტრის, ნიკა რურუას ბრძანებით გაათავისუფლეს. ბრძანებას ნიკა რურუამ 2011 წლის 15 აგვისტოს მოაწერა ხელი.